Zadorrak gainezka egin du Gasteizen eta Iruña Okan
Zadorra ibaia bere bidetik atera da Margaritan (Gasteiz) eta Tresponten (Iruña Oka), asteburuan izandako euri-jasak direla eta.
Ibaia maila laranjara heldu da Eturan (Barrundia) eta maila horian dago Abetxukun (Gasteiz) eta Ozaetan (Barrundia). Segurtasun Sailaren arabera, Abetxuku auzoan segundoko 80 metro koadro baino gehiago bota ditu.
Hori horrela, Gasteizko Udaltzaingoak Eraztun Berdearen oinezko bidea itxi du, Aguirrelanda eta Abetxuku zubiaren artean, han uholdeak gerta daitezkeela eta.
Gainera, oinezkoentzako hainbat tarte itxi dituzte, honakoak: Gamarra eta Abetxuku arteko Zadorraren erriberatik doana, Zadorra Etorbideko biribilgunearen ingurukoak eta Alegria ibaiaren oinezko pasabidea (Zurbano atearen eta Bergara atearen artekoa).
Abetxuku auzoan hainbat ur putzu egin direla eta, esku hartu behar izan du Gasteizko Udaltzaingoak. Urarteko Baratzeetan aparkatutako autoak erretiratzeko eskatu dute, eta sarbideak itxi dituzte.
Gainera, N-622 errepidetik A-1erako tartea zaintzen ari dira (Astegieta, Ihurre eta Lopida parean), arrazoi beragatik.
Dena dela, Gasteizko Udalak jakinarazi duenez, suhiltzaileek ez dute irteerarik egin behar izan uholdeak gorabehera.
Bestalde, Omecillo eta Baia ibaien emariek ere hazten jarraitzen dute, eta ez dute baztertzen uholde txikiak izatea.
Gipuzkoan, Oria maila horira iritsi da Alegia eta Araxes (Lizartza) estazioetan.
Bizkaiko lurraldean, Ibaizabal (Zeanuri) bakarrik dago maila horian, Cadagua (Sodupe parean) maila berdera jaitsi baita. Azken horrek gainezka egin du goizean Quadra-Lakabex auzoan (Gueñes), baina ohikoa izaten da euria egiten duenean.
Eusko Jaurlaritzako Segurtasun Sailak euriteengatik ezarritako alerta laranja bertan behera utzi du. Nolanahi ere, 18:00ak arte abisu hori bat izango da indarrean Bizkaian, Gipuzkoan eta Araba iparraldean prezipitazio iraunkorrengatik. Gainera, elurra barnealdean egin dezakeela eta, abisu horia dago aktibo biharko 18:00ak arte. Nafarroan ere elurragatik eta euriagatik ezarritako abisuak bertan behera geratu dira eguerdian.
Argak eutsi egin dio
Nafarroan, Foru Gobernuak uholdeen planaren 0 mailari eutsi dio gaur, denboralea noiz arinduko zain. Prezipitazioak, oro har, ekaitzaren hasieran aurreikusi zirenak baino txikiagoak izan dira, eta Arga ibaiak goia jo du Iruñerrian, igandeko 23:30ean, segundoko 206,82 metro kubiko botata.
Dena dela, Arga alerta mailara (maila gorria) iritsi da azken orduetan Arakilen eta Etxaurin; Oltza Zendea parean, aurrealerta fasean dago (laranja). Iruñean behera egin du emariak, eta goizaldean aurrealertan egon bada ere, orain normala da egoera.
Hori horrela, Iruñeko Udalak uholdeetarako larrialdi-planaren 1. maila desaktibatu du, emariak behera egin duela eta.
Hemendik aurrera, posible da aparkatzea urak hartu ohi dituen guneetan (Corralillos, Runa parkea, Igeriketa eta Magdalena ingurua). Goizaldean garabiarekin erretiratu dituzten ibilgailuak inguruan topatuko dituzte jabeek.
Halaber, Egaren emaria ere asko hazi da, eta aurrealertan dago Lizarra, Murieta eta Andosilla parean.
Bestalde, Ebroko Konfederazio Hidrografikoak (CHE) astearterako espero du Ebro ibaiaren emari maximoak Tuterara iristea. Zehazki, CHEk ohar batean azaldu duenez, Ebro ibaian Aragoi ibaitik datorren ur-goraldiaren maximoa, Alfaro-Castejon-Tutera tartera asteartean helduko dena, 1.500-1.900 metro kubiko segundoko balioekin.
Tuterako Udaltzaingoak CHEk emandako informazioaren arabera, 1.550 metro kubikoko emaria espero da asteartean, 13:45ean, Erriberako hiriburuan. "Emari horiekin ez da espero arazorik hirian, erregistro historikoaren arabera", azaldu du udaltzaingoak X sare sozialean.
Hala ere, badaezpada, Udaltzaingoak urak hartu ohi dituen garajeetako ibilgailuak ateratzeko gomendioa eman du.
Arazoak Nafarroako zenbait errepidetan
Ibaien emaria handitzeak arazoak eragin ditu Nafarroako hainbat errepidetan, besteak beste, A-21 Pirinioetako Autobian. 12. kilometroan moztu egin behar izan dute, ur-pilaketaren ondorioz.
Nafarroako Gobernuak emandako errepideei buruzko informazioaren arabera, autobia horretan moztuta dago Elortzera sartzeko azpiko pasabidea, bi noranzkoetan.
Halaber, uholdeak direla eta, itxita daude NA-30 errepidea, Iruñean, Landabengo industrialderako sarbidean; NA-2316 errepidea, Zuluetan; NA-7010 errepidea, Astrain-Irurtzunen, 8. kilometroan; NA-2410 errepidea, Barrankan, 12,200 kilometroan, eta NA-6140 errepidean (Tafalla-Miranda Arga) 11-13 kilometroetan.
Zure interesekoa izan daiteke
Zestoako kasuari buruz gizarte-zerbitzuek egindako txostena "ez zen zuzena", Arartekoaren teknikari baten arabera
Zestoako sei herritarren aurka atzo abiatutako epaiketaren bigarren saioan deklaratu du Herriaren Defendatzailea erakundeko langileak, defentsaren lekuko gisa.
Kirola, musika eta lan gogorra: 110 urteko Isabel donostiarraren sekretua
Isabel Etxeberriak, 110 urterekin, pianoa jotzen jarraitzen du, arratsaldero, Bartzelonako bere etxean. Betidanik egin izan du kirola, eta gaur egun ere oso bizimodu aktiboa duela kontatu digu. Bere iritziz, sasoiz zahartzeko, garrantzitsuagoa da maitasuna kontu materialak baino.
Eider Gotxi (Guggenheim Urdaibai Stop): "Herritarron lanari esker lortu da Guggenheim Urdaibai proiektua bertan behera geratzea"
Guggenheim Urdaibai egitasmoa behin betiko bertan behera gelditu eta biharamunean, erakundeen jarrera "zurrun eta inposatzailearen aurrean" herria garaile atera dela azpimarratu du Eider Gotxi Guggenheim Urdaibai Stop plataformaren bozeramaileak. Garaipena jai giroan ospatzeko otsailaren 7rako Gernikan antolatu duten ospakizunean parte hartzeko deia egin die herritarrei. Bestalde, Gotxik ohartarazi du plataformaren bidea ez dela bukatzen eta ontziola Muruetatik ateratzea izango dela hurrengo erronka.
Gutxienez 11 kilometroko auto-ilarak AP-8an, Irunen, eta kamioiak ezin dira Biriatuko mugan zehar pasa
AP-8an, gutxienez 11 kilometroko auto-ilarak daude Irun parean, Baionarako noranzkoan, eta 0 kilometroan kamioientzako trafikoa arautzeko neurri bereziak aktibatu dira. Ibilgailu astunen murrizketak 05:00etatik 20:00etara egongo dira indarrean.
ETB ON aurkeztu dute, EITBren telebista plataforma digital berria
ETB ON plataforman zuzenekoen eskaintza handia eta EITB Taldearen edukirik onenak klik bakar batean topatuko ditu erabiltzaileak, nahi duen unean eta moduan ikusteko. Teknologia berri bat ardatz hartuta, Nahieran plataforma historikoa birformulatu eta etorkizunera begira jarri du EITBk.
Gernika, Bermeo eta Mundakako herri plataformek Busturialdea-Urdaibairako plan estrategikoa kritikatu dute
Ez daude ados Eusko Jaurlaritzak eta Bizkaiko Foru Aldundiak eskualderako egin duten inbertsio planarekin. Eskualdea zahartzen ari dela diote, gazteak kanpora joaten ari direlako ez dutelako bertan lan egin eta bizitzeko aukerarik. Beraz, lehendabizi enplegua eta etxebizitza planak behar direla diote.
Urdaibaiko Guggenheim museoa baztertu dute, proiektua iragarri eta 17 urtera
Bi urteko azterketa eta hamaika eztabaidaren ondoren, Urdaibaiko Guggenheim proiektua baztertzearen erabakia hartu du Patronatuak. Orain hilabete, Elixabete Etxanobe Bizkaiko ahaldun nagusiak azaldu zuen luze joko zuela museoa eraikitzeko lurrak garbitzea, bai eta egitasmoaren aurkako salaketak epaitegietan argitzea ere. Eta kalean proiektuak kritika andana jaso izan du talde ekologisten eta herritarren aldetik.
Guggenheim Urdaibai egitasmoa behin betiko baztertu du museoko Patronatuak
Arratsaldean egindako bileran aho batez hartu dute azken erabakia, proiektuaren bideragarritasun faltagatik. Egitasmoa aurrera eramateko zailtasun handiena Murueta ontziola dagoen lur zatiaren egoera juridikoa dela jakinarazi du Elixabete Etxanobe diputatu nagusiak.
163 postuk eta hogei bat jarduerak girotuko dute Donostiako San Tomas azoka
Datorren igandean, Gipuzkoako hiriburuan izango den azokara hurbilduko direnek, salmenta postuez gozatzeaz gain, gustu eta adin guztietarako jardueretan parte hartu ahal izango dute.
Entzute prozesuak islatzen du Guggenheim Museoa Urdaibain zabaltzerik "ez" dela nahi, baina eskualdeko garapenari begi onez begiratzen zaiola utzi du agerian
Herritarren artean entzute-prozesua gidatu duen Agirre Lehendakaria Centerrek azaldu duenez, "hasierako narratiba" horien zati handi bat "beste joera bat" hartu du hilabeteetan zehar. Izan ere, Urdaibaiko Guggenheimen aurkako iritziak jaso dira, baina baita eskualdearen garapenaren aldeko jarrerak ere.