Zaparradak eta haizea, eguneko protagonistak
Euskalmet euskal meteorologia agentziaren iragarpenaren arabera, ostegun honetan, hego-ekialdeko haizeak gogor jotzen jarraituko du eta zaparradak botatzeko probabilitatea handiagoa izango da, batez ere arratsaldetik aurrera.
Abisu horipean gaude haizeagatik, haizeguneetan, 15:00etara bitartean. Hego-ekialdeko haize-boladek 100 km/h abiadura gaindi dezakete haizeguneetan, bereziki ekialdeko mendi inguruetan. 03:00etatik 09:00etara (bertako ordua) haizea zakarrago ibiliko da eta haize-boladek 110 km/h baino biziago ibiliko dira. Kostaldean haize-boladak 80-100 km/h ingurukoak izango dira.
Arratsaldean ezegonkortasuna handitu eta euritara joko du. Barnealdean sarriago egingo du euria eta baliteke noizean behin zaparrada trumoitsuak eta handiak botatzea.
Tenperaturan, aldaketa gutxi. Hiriburuetan, Baionan 11 gradu espero dira gutxienez eta 21 gehienez, Bilbon 15 gutxienez eta 20 gehienez, Donostian 14 gutxienez eta 20 gehienez, Gasteizen 10 gutxienez eta 15 gehienez, eta Iruñean 11 gutxienez eta 17 gehienez.
Itsasgorak 07:41ean eta 20:03an izango dira, eta itsasbeherak 01:37an eta 13:55ean. Uraren tenperatura 13 gradukoa izango da, eta ikuspena, hamar kilometrotik gorakoa.
Asteburura begira
Ostiralean hodeiak gailenduko zaizkie ostarteei, zerua guztiz estalita egongo ez den arren. Noizbehinka zaparrada txikiak botako ditu, bereziki egunaren lehenengo partean; egunaren hasieran zaparrada mardulak bota ditzake oraindik barnealdeko zenbait tokitan. Hegoaldeko haizea gogor ibiliko da, batez ere egunaren lehenengo partean. Tenperaturan aldaketa handirik ez, eta gutxi jaitsiko da.
Larunbatean, goiz-lanbroa izango da. Zerua tarteka hodeitsu egongo da, bereziki barnealdean. Zaparrada txikiak egingo ditu, batez ere ekialdean, eta baliteke zenbait lekutan ertainak izatea. Hego/hego-mendebaldeko haize ahul-bizia ibiliko da, bolada gogorrekin, bereziki mendi inguruetan; eguerdian mendebal/ipar-mendebaldera egingo du, bolada gogorrekin kostaldean. Tenperatura gutxi jaitsiko da.
Igandean, zerua hodeitsu edo oso hodeitsu egongo da. Zaparrada txikiak botako ditu, baliteke barnealdeko zenbait tokitan ertainak eta trumoitsuak izatea. Ipar-osagaiko haize ahul-bizia ibiliko da. Tenperatura aldetik, larunbateko joerari eutsiko dio.
Zure interesekoa izan daiteke
Marea txuri-urdina Sevillara!
Realeko zaleak Andaluziara bidean dira Atletico Madrilen aurkako Errege Kopako finala bertatik bertara jarraitzeko. 26.000 realzale baino gehiago Cartuja estadioan bertan izango dira eta beste milaka pertsonak sarrerarik gabe bidaiatuko dute. Helburua bat eta bakarra: Kopa Donostiara ekartzea.
Ertzaintzak 255 marihuana-landare aurkitu ditu Lemoan, etxebizitza batean sutea piztu ostean
Etxean bizi zen gizonak onartu du landareak bereak zirela, eta horregatik atxilotu dute osasun publikoaren aurkako delitu bat egotzita.
Askotariko proposamenak San Prudentzio eta Estibalizko Andra Mariaren jaietarako
Tradizioa, kultura eta musika uztartzen dituzten proposamenak prestatu dituzte adin guztietako jendearentzako. Apirilaren 24an, ostirala, hasiko dira jaiak, Probintzia Plazan egingo den pregoiarekin. Antonio Altarriba saiakeragile eta eleberrigileak egingo du aurten pregoia.
Negu Gorriak elkarteak manifestazioa deitu du larunbaterako, Aranzaditik etxegabeak kanporatu izana salatzeko
Udalak emandako erantzuna kritikatu du kolektiboak, "aldi baterako konponbideekin" arazoari ez zaiolako errotik heltzen. Etxegabeentzat "egiturazko neurriak" eskatu dituzte.
Gaurtik, eskaintza osasungarri eta jasangarria izan beharko dute Hego Euskal Herriko eskola-jantokiek
Hego Euskal Herriko eskoletan, jangelek aurrerantzean derrigorrez bete beharko dute elikadura osasungarria bermatu asmo duen legea. Besteak beste, fruta eta barazkien kontsumoa bermatuko da, eta proteinen eta janari frijituen maiztasuna murritu. Horrez gain ikastetxeetako vending makinetako produktuek ere mugak izango dituzte.
Burdineria korrosioak jota zegoelako erori zen El Bocaleko pasabidea, perituaren esanetan
Peritu judizialak azaldu duenez, loturetako batean izandako akatsak beste loturen gaineko karga handitu zuen, eta horrek lehen eta bigarren mailako habeen arteko lotura guztiek huts egitea eragin zuen, eta taula erorarazi. Gainera, ondorioztatu duenez, ez dago egituraren mantentze-planik egin den ebidentziarik.
Renfek Donostiako tren-zerbitzua indartuko du, Kopako finala dela eta
Larunbat goizaldean (02:10ean) Donostiatik tren berezi bat irtengo da, Sevillako Cartuja geltokira 10:40an iristeko. Itzulerako trena Atletico Madril eta Realaren arteko partida amaitu ondoren aterako da Gipuzkoako hiriburura.
Zumaian agertutako gorpua Eibarren desagertutako 60 urteko emakume batena da
Autopsiaren arabera, pasa den igandean Itzurun hondartzan agertutako gorpuak ez zuen kriminalitate zantzurik. Apirilaren 13an, emakumearen senide batek agertu barik zegoela salatu zuen Eibarko ertzain-etxean, hilaren 11tik haren berririk ez zuelako.
Bertan behera gelditu da Lapurdin isuri gutxiko eremua sortzeko egitasmoa, eta aurrerantzean ere ez da bereizgarririk beharko
Lehen Asanblea Nazionalak egin bezala, orain Senatuak bidea itxi dio Lapurdiko kostaldean isuri gutxiko eremua sortzeko neurriari. Frantziako Gobernuak proposatutako neurriari ultraeskuinak jarritako ebazpena aintzat hartu du Ganberak.
Emakume bat atxilotu dute Bilbon, bikotekidea barruan zela lonja bati su emateagatik
Hainbat lekukok ikusi dute gertatutakoa: atxilotuak Atxuri auzoko lonja horren barrura zerbait bota du, eta sua piztu da gero. Emakumearen bikotekidea zegoen barruan, eta Basurtuko Ospitalera eraman dute.