Gasteizko Udalak "itzalitzat eta erabat kontrolatutzat" jo du LEA fabrikan izandako sutea

Gasteizko LEA higiene pertsonaleko produktuen fabrikan ostiralean piztutako sutea "itzalita eta erabat kontrolatuta" dagoela esan du Udalak, suhiltzaileek gune zehatz batzuk hozten jarraitzen badute ere. 

Halaber, Udal Larrialdi Plana indargabetu dute eta dagoeneko zabaldu dituzte oraindik itxita zeuden errepideak. Sua ostiralean piztu zen, 13:45ean, lantegiaren oleokimika gunean.

Cesar Fernandez de Landa Gasteizko Udaleko Segurtasun zinegotziak jakinarazi duenez, sutea "oso larria" izan da, baina ez da kalte pertsonalik izan. Larrialdi zerbitzuek lau pertsona artatu behar izan zituzten, eta ezer larririk izan ez arren, horietako bi osasun-zentroetara eraman behar izan zituzten.

Horren hitzetan, suak "dena txikituta" utzi du, "bulegoetatik hasi eta industria-lantegiraino, horren egitura guztiz hondatu eta behera etorri baita". "Barruan zeuden auto batzuk kiskali egin dira eta beste batzuei gainera etorri zaie egitura", erantsi du. 

Sua nola piztu zen galdetuta Fernandez de Landak esan duenez, "suhiltzaileek ikerketa egingo dute, eta Ertzaintzari emango diote".

"Jarduera honek ingurumen-baimen integratua zuen, enpresaren jarduerari dagokionez, eta hori Eusko Jaurlaritzak kudeatzen du", zehaztu du. Hala ere, sutea kamioi bat deskargatzen ari zirenean piztu zela esan dute, baina "egun batzuk" beharko dira zehazteko.

Inguruneko airearen kalitateari buruz galdetuta, berriz, gogorarazi du Eusko Jaurlaritzako Ingurumen Sailak "kontuz ibiltzeko eta maskara erabiltzeko" gomendatu duela, baina "ez dago arazorik".

Horren arabera, enpresaren barruan zeuden produktuak "olio begetalak ziren, eta, edozein ke bezala, ez da gomendagarria arnastea, baina ez ziren arriskutsuak izan daitezkeen produktu kimiko toxikoetatik zetozenak".

Leherketa-arriskua

Zinegotziak adierazi duenez, hasiera batean sutea "oso eskandalagarria" izan zen, eta suhiltzaileentzako zailtasun nagusia bertara sartzea izan zen, lantegi barruan eztandak izateko arriskua baitzegoen. Leherketa-arriskua hidrogeno-bonbonek eragiten zuten; izan ere, ez zeuden % 100 beteta baina lehertzeko arriskua zegoen.

Suhiltzaileen jarduna, kasu honetan, bonbonak urrutitik freskatzea izan zen, "arazo hori saihesteko", eta behin bonbonak kontrolpean izan zituztenean, hoztuta zeudenez, "gainerakoa itzaltzera pasatu ziren".

Zinegotziak eskerrak eman dizkie sutea kontrolatzeko lanetan jardun zuten suhiltzaileei eta erakundeei, bai eta Euskotreni eta Tuvisari berari ere, garraio publikoa desbideratu eta osatzeagatik.

Horren esanetan, Euskotreni jakinarazi diote Artapadura kaleko geltokia irekitzeko moduan dela eta egoerari erantzuteko sortu zen krisi-mahaia desegin dezakeela.

Gasteizko Udalak baieztatu duenez, 14:15 aldera ireki zituzten lantegiaren inguruan itxita zeuden bideak.

Felix Lascaray LEA-Lascaray enpresako zuzendari exekutiboaren hitzetan, familia eta langile guztiak "erabat atsekabetuta daude, atzokoa oso larria izan zen eta kalteak baloratzen saiatzen ari gara".