Elkartasunaren txupinazoak eman die hasiera 2025eko sanferminei

Hasi dira 2025eko Sanferminak Iruñean, Udaletxe plazan eta inguruko kaleetan milaka iruindar eta bisitari bildu dituen txupinazo jendetsu batekin.

2025eko Sanferminetako txupinazoa botatzeko herri bozketan aukeratutako Yala Nafarroa Palestinarekin plataformako ordezkariek piztu dute suziriaren metxa eta horrekin eman diote hasiera uztailaren 14ko gauerdiko 'Gaixoa ni-rekin 204 orduz etenik izango ez duen jaiar. Jaien hasieran, Palestinaren aldeko zenbait bandera eta mezu ikusi ahal izan dira Udaletxe plazan.

Zehazki, Yala Nafarroa plataformako Lidon Soriano Segarrak, Dyna Kharrat Juanbeltzek eta Eduardo Ibero Albok jaurti dute txupinazoa. 12:00ak baino lehen, hirurak udaletxeko balkoira atera dira kufiyak lepoan, eta plazan milaka pertsona, beren jantzi zuriarekin eta gerriko gorriarekin, "San Fermin, San Fermin" oihukatuz ari ziren unea ospatzen.

"Iruindarrak! ¡Pamplones, pamplonesas! ¡Viva San Fermin! Gora San Fermin!". Lidon Sorianok eta Eduardo Iberok oihukatu dituzte urteroko hitzak, milaka neska-mutilek beren zapi gorriak zerura altxata bibaka eta goraka eri zirelarik. 

Ekitaldia arautzen duen Alkatetzaren dekretuak baimentzen ez duen arren ohiko hitzei bestelakorik gehitzerik, Lidon Sorianok "Stop Genocide! Free Palestine!" oihukatu du. 

Ondoren, plataformako hiru ordezkariek suziriaren metxa piztu dute elkarrekin, kosta da gaurkoan su hartu zezan, baina azkenean piztu da eta 12:01 zirenean egin du eztanda Iruñeko zeruan. Lidon Sorianek "Gora Palestina libre" oihukatzen zuen bitartean. 

Txupinazoaren eztandarekin, pozak gainezka egin du Iruñean. Lagun dute eguraldia, ateri eta epel baitago. 

Udaletxearen barruan, Joseba Asiron alkatea, UPN, EH Bildu, PSN, PPN, Geroa Bai eta Contigo-Zurekin alderdietako zinegotziak, Sandra Nadal 2025eko sanferminetako kartelaren irabazlea eta Nafarroako hainbat herritako alkateak izan dira.

Ordezkari politikoen artean, Elma Saiz Inklusio, Gizarte Segurantza eta Migrazioetako ministroa, Unai Hualde Nafarroako Parlamentuko presidentea, Alicia Echeverría Espainiako Gobernuak Nafarroan duen ordezkaria eta Nafarroako Gobernuko kontseilariak zeuden.

Elkartasun mezua, Iruñetik mundura

Joseba Asiron Iruñeko alkateak igande honetan nabarmendu duenez, "elkartasun, arrazionaltasun eta gizatasun mezua bidali dio hiriak munduari", 2025eko sanferminei hasiera eman dien txupinazoarekin.

Asiron pozik agertu da Yala Nafarroa plataforma izan delako txupinazoa botatzeko arduraduna, "egunero albistegia jartzeak izutu egiten duen zerbait delako, munduan gauzak nola dauden ikusteagatik".

"Eta Iruñetik, Iruñearentzako unerik gozoenean, munduari elkartasun, arrazionaltasun eta gizatasun mezu bat helarazteko gai garela ikusita, esan dezakedan gutxienekoa da harro, oso harro nagoela nire hiriaz, Iruñeaz", adierazi du alkateak hedabideen aurrean, txupinazoa bota aurreko uneetan.

240 orduko festari hasiera

Suziriaren jaurtiketarekin batera iritsi da festa hasiera honek uzten duen beste irudirik ikusgarrienetako bat, gaitariena, plaza betetzen duen jendetzaren artean.

Udalak 517 ekitaldi antolatu ditu uztailaren 14ra arte, 1,95 milioi euroko aurrekontuarekin, aurreko urtean baino % 5,4 gehiago.

Jaien barruan ez dira faltako Bezperetako tradizio erlijiosoak, uztailaren 14ko San Fermin prozesioa edo Zortzigarrena, ezta entzierroak, zezenketak, ezta ekitaldi zabalagoak ere, hala nola su artifizialen bildumen emankizunak eta Erraldoi eta Buruhandien konpartsaren irteerak.

Sanferminen nazioarteko izaera agerian geratu da aurten ere, Prentsaren Nazioarteko Bulegoan 13 herrialdetako 140 komunikabide akreditatu baitira, 450 profesional, guztira.

Jaiak normaltasunez joan daitezen, osasun, segurtasun eta garbitasun zerbitzu bereziak ezarri dira.

Eraso sexisten aurkako borroka lehentasuna da Iruñeko Udalarentzat, baita sanferminetan ere. Jaien erdigunean, Gaztelu plazan, eraso sexistei buruzko informazio gune bat ireki da, non ‘Iruña eraso sexistarik gabe, Iruña aske' baten aldeko konpromisoa irudikatzen duen eskuaren sinboloa den nagusi.