Delitu eta larrialdi gutxiago izan dira sanferminen lehen erdian

2025eko San Fermin jaien erdian, sexu-erasoen salaketen kopuruak beherakada nabarmena izan du, orain arte sei izan dira, hau da, % 62 jaitsi dira 2024an erregistratutako 16 salaketekin alderatuta. Zazpi atxiloketa egin dira gisa horretako delituekin lotuta.

Foruzaingoak, Iruñeko Udaltzaingoak, Guardia Zibilak eta Polizia Nazionalak, guztira, 782 salaketa jaso dituzte jaien lehen lau egunetan, hau da, aurreko urteko epe berarekin alderatuta, % 26 gutxiago. Denbora horretan, 95 atxiloketa egin dituzte.

Salaketen artean, gehien-gehienak lapurretak dira oraindik ere, 526 kasu zenbatu dituzte. Zifra horrek % 27ko beherakada islatzen du, 2024ko datuekin alderatuta.

Ostegunean eman dute datuon berri Amparo Lopezek, Nafarroako Barne Funtzio Publiko eta Justizia kontseilariak, eta Fernando Dominguezek, Osasun kontseilariak SOS Nafarroako Aretoa bisitatu dutenean.

Lehen lau egun hauetan, SOS Nafarroa zerbitzuak, batez beste, 2.248 dei hartu ditu egunean, 2024an erregistratutako batezbestekoa (2.571) baino gutxiago. Guztira, 8.995 dei jaso dira 112 telefonoaren bidez; iaz, berriz, 10.791 izan ziren.

Mobilizazio espezifikoei dagokienez, 248 esku-hartze egin dira, eta horietatik 151 anbulantziek egin dituzte. Kopuru horiek ere aurreko urtekoak baino txikiagoak dira, orduan 321 mobilizazio eta anbulantzia bidezko 223 lekualdatze erregistratu ziren, hau da, % 22,7 apaldu da datua.

Entzierroei dagokienez, SOS Nafarroa koordinazio-zentroak 24 anbulantzia mobilizatu eta 25 lekualdatze egin ditu lehen lau egunetan.

Bestalde, Dominguezek osasun arloko behin-behineko balantzea egin du, eta adierazi du uztailaren 6ko eguerditik gaur arte 1.734 larrialdi artatu direla Nafarroako Unibertsitatea Ospitalean; 713, San Martin doktorea osasun-zentroan, eta 599, Buztintxuriko zentroan.

Gorabehera gehienak traumatismoak, intoxikazio etilikoak eta erasoak izan dira, ospakizunekin lotutako beste arrazoi batzuen artean. Erietxean 117 larrialdi orokor eta 6 pediatriko erregistratu dira, eta ospitaleez kanpoko larrialdietan, berriz, 106.

Azkenik, iragarri dute uztailaren 15ean, jaiak amaitu ondoren, balantze orokorra aurkeztuko dela, eta aurreko urteetako datuekin alderatuko direla aurtengo datuak.