Bizkaiko farmaziek bat egin dute arazo soziosanitarioetako egoerak detektatzeko programarekin

Bizkaiko Farmazialarien Elkargoak (COFBi) eta Euskadiko Udalen Elkarteak (Eudel) hitzarmen bat sinatu dute Bizkaiko farmazietatik udaletako gizarte-zerbitzuek artatu ditzaketen arazo soziosanitarioak detektatzeko programa bat abian jartzeko, indarkeria matxista edo bakardade kasuak, besteak beste. 

Akordio hori indarrean dago jada Araban eta Gipuzkoan, eta Bizkaiarekin batera osatzen da farmazien eta udaleko gizarte-zerbitzuen arteko lankidetza-sarea, EAEko biztanleria osoari estaldura emateko.

Akordio horren bidez, farmazia komunitarioen sarearen eta gizarte-zerbitzuen arteko koordinazio-mekanismoak ezartzen dira, esku hartzeko jarraibideak eta irizpideak adosteaz eta farmazien eta udalen arteko lankidetza hobetzeaz gain, Eudelek jakinarazi duenez.

Bizkaiko farmazia komunitarioen sarea 439 establezimenduk osatzen dute, eta horietatik 149 Bilbon daude.

Farmaziek informazioa emateaz gain, dagozkien gizarte-zerbitzuetara jotzera bultzatuko dituzte pertsonak; edota, bestela –eta beti pertsonaren aldez aurreko baimena izanez gero–, farmaziak hitzordua eskatuko du edo zuzenean jarriko da harremanetan udaleko gizarte-zerbitzuekin.

Kontuan hartuko diren egoeren artean da bakardadearena, edozein arrazoirengatik, gizarte- eta familia-sare gutxi edo batere ez duten pertsonena eta gizarte-isolamenduko egoeran egon daitezkeenak. Halaber, arreta jarriko dute autonomia pertsonala galdu edo  mendekotasun-egoeran edo -arriskuan egon daitezkeen egoeretan, bereziki, narriadura kognitiboa, muga funtzionalak, elikadurarekin eta higienearekin lotutako arazoak edo oinarrizko beharrak behar bezala betetzen ez dituzten pertsonen kasuetan. 

Familia zaintzaileen gainkarga eta etsitze egoerak ere jakinaraziko dira, baita indarkeria matxista edo familia barruko indarkeria kasuak ere. Adinekoen kontrako tratu desegokia edo tratu txarrren egoerak ere bideratuko dira. 

Esther Apraiz Eudeleko elkarteburuak oso positibotzat jo du hitzarmena sinatzea "lurraldean dauden baliabide publiko soziosanitarioen saretik gure laguntza behar duten pertsonengana gehiago eta hobeto iristeko".

Apraizek nabarmendu duenez, “farmaziak oinarrizko aliatu bihurtzen dira udaletako gizarte-zerbitzuetan, eta horiek dira baliabideen eta prestazioen euskal sisteman sartzeko atea. Bizkaiko udalerri guztiek farmazia bat dute, eta farmazia hori gure herritarren behar soziosanitarioak detektatzeko radarra izango da.”

Juan Uriarte Farmazialarien Elkargoko presidenteak azpimarratu duenez, Bizkaiko farmazia komunitarioen sarea “osasun sisteman sartzeko funtsezko atea” da, “bereziki kapilaritateagatik, gertutasunagatik eta herritarrengan sortzen duen konfiantzagatik” eta, nabarmendu du hitzarmenarekin  “farmaziak bere dimentsio/orientazio sozialarekiko duen konpromisoa indartzen" dela.