Euskadi, errendimendu akademiko handiena dagoen eta kalitatezko enplegu gehien lortzen den erkidegoen artean

Euskal unibertsitateak kalitatearen eta dibertsitatearen erreferente gisa finkatu dira, eta errendimendu akademiko handiagatik eta ikasle tituludunak lan-merkatuan sendotasunez sartzeagatik nabarmentzen dira. Hala erakusten dute Euskadiko goi-mailako hezkuntzari buruzko azken txostenek: Lanbidek 2020an unibertsitate ikasketak bukatu zituzten ikasleen laneratzeari buruz egindako azken inkestak, batetik, eta CYD Fundazioak landutako Espainiako unibertsitateak. Ikuspegi autonomikoa. 2025 Euskadi izeneko txostenak, bestetik.

Euskadiko ikasleak Unibertsitatera sartzeko aukera gehien dituztenen artean daude. Hamasei urtetik gorako biztanleen erdiak eta biztanleria aktiboaren ia bi herenek unibertsitate-ikasketak dituzte.

Errendimendu akademikoaren adierazleak Euskal Autonomia Erkidegoan (EAE) kalitatezko prestakuntzaren alde egindako apustuaren isla dira. Euskadi bigarren dago ikasketak aurreikusitako epean amaitzen dituzten graduko tituludunen ehuneko handiena duten autonomia-erkidegoen artean (% 51,4, Estatuko aurrez aurreko unibertsitateen % 42,7ren aldean), eta laugarren, masterreko tituludun kopuruari erreparatuta (% 82,1 eta % 74,8, hurrenez hurren).

Horrez gain, STEM ikasketetan (Zientzia, Teknologia, Ingeniaritza eta Matematika) titulazioak dituzten ikasleen ehuneko handiena duen bigarren erkidegoa da (%29), Asturiasen ia parean (% 29,5) eta Estatuko batezbestekoaren oso gainetik (% 21). Gainera, ingeniaritza titulazioen sailkapeneko buruan dago, % 17ra iristen baita, Estatuko batezbestekoaren % 9aren aldean.

Laneratzea
Euskal unibertsitateetan titulatu direnen laneratzea da euskal unibertsitate-sistemaren indargune nabarmenetako bat, Eusko Jaurlaritzak datuon harira egindako balorazioaren arabera. Lanbideren laneratzeari buruzko inkesta berrienak, 2020ko promozioko datuak hartuta egindakoak, agerian uzten du ikasleen % 88k beren kualifikazioari egokitutako enplegua lortu dutela ikasketak amaitu eta hiru urtera (% 2ko igoera aurreko promozioarekin alderatuta) eta % 76k, berriz, beren titulazioarekin lotura zuzena duen lanpostu batean lan egiten dutela. 2023 urtearen amaieran, 2020ko promozioaren % 85ek bazuten enplegua, eta % 7ek trebatzen jarraitzen zuten.

Euskal ikasleek jasotzen duten "prestakuntza sendoa" da, Jaurlaritzaren esanetan, laneratzeari buruzko datu horien sorburua. Horrela, CYD Fundazioaren txostenaren arabera, Euskadik Estatuko laugarren portzentaje handiena du titulaziora egokitutako enpleguari dagokionez, eta urteko diru-sarrera handienak lanaldi osoko lanagatik. Masterretan ere emaitzak onak dira: bosgarren postuan dago kontratu mugagabeei dagokienez, laugarrenean, lanaldi osoko kontratazioen proportzioan, eta laugarrenean, urteko batez besteko kotizazio-oinarrian.

Ildo horretan, azpimarratzekoa da, halaber, Euskadin laneratze-adierazle onenak dituzten tituludunak ingeniaritzan, industrian eta eraikuntzan graduatutakoak direla, informatika eta osasuna atzetik dituztela.

Gainera, enplegua gero eta egonkorragoa da. Lanbideren arabera, 2020an titulua lortu zutenen % 61ek kontratu finkoa du, aurreko urtean baino 16 puntu gehiago, inoizko daturik onena. Emakumeen artean, egonkortasuna 15 puntu hazi da, % 55eraino. Langabezia-tasa ere % 8ra jaitsi da, azken hamarkadako daturik onena.