Adamuzen istripua izan zuen Iryoko treneko makinista "katigatuta" zegoela jakinarazi zuen, eta zirkulazioa geldiarazteko eskatu zuen

Kordoban tren istripua izan zuen Iryoren treneko gidariak Adamuz parean "katigatuta geratu" zela adierazi zion Atochako aginte-zentroari, eta bigarren komunikazio batean, berriz, ohartarazi zuen trena errailetik atera zela eta ondoko trenbidea inbaditzen ari zela. Hori dela eta, zirkulazioa "lehenbailehen" geldiarazteko eskatu zuen.

Cordopolis/eldiario.es-ek argitaratutako audioaren arabera, tren-gidariak Atochako aginte-zentrora egindako lehen dei batean azaldu zuen trena "blokeatuta" zuela eta ezin zela mugitu. Gainera, trena nola zegoen ikusi behar zuela gaineratu zuen.

Atochako langileak pantografoak jaisteko eskatu zion makinistari, katenariatik elektrizitatea hartzen duen trenaren mekanismoa, eta horrek hau erantzun zion: "Beherago ezin dira egon".

Bigarren telefono-kontaktu batean, tren-gidariak azaldu zion trenbideko trafikoa lehenbailehen gelditu behar zela, eta Atochako langileak esan zion ez zela "trenik iritsiko", aipatu hedabidearen arabera.

Jarraian, tren-gidariak jakinarazi zuen sua zegoela konboian: "Sua piztu da. Kabinatik alde egin behar dut, egiaztatu behar dudalako zer ari den gertatzen. Kotxe bat sutan daukat", esan zuen laguntza eskatu aurretik: "Mesedez, larrialdi-zerbitzuak, suhiltzaileak eta anbulantziak bidali, hainbat zauritu daude trenean".

Atocharen baieztapenarekin amaitzen da elkarrizketa: "Ba, hemendik jakinaraziko dizut, orain zurekin harremanetan jarriko naiz. Ados". 

Audioak igande honetan, urtarrilak 18, Iryoren 6189 trena errailetik atera zen une zehatzare kontakizuna egiten du. Tren horretan 300 pertsona inguru zihoazen, eta Málaga-Puerta de Atocha ibilbidea egiten ari zen.

Iryoko gidariak bi dei egin zituen 3-4 minutuko tartean, eta bi trenen arteko talka 9 segundo baino gutxiagoan gertatu zen 

Oscar Puente Espainiako Garraio ministroak azaldu duenez, Iryoren treneko gidariak Atochako (Madril) aginte-zentrora egindako bi deien artean hiru eta lau minutu artean igaro ziren.

Gainera, zehaztu duenez, bidetik atera zen Iryo trenaren eta aurkako noranzkoan zihoan Alviaren arteko talka 9 segundo baino gutxiagoan gertatu zen, eta ez 20 segundoan, hasieran esan zen bezala. 

Telecincori egindako adierazpenetan, Puentek baieztatu du "markak" daudela Iryo trenaren lehen bost bagoietako gurpiletan eta trenbidearen tarte horretan ibili ziren beste tren batzuetan.