D bitaminak eta folatoek plastiko kutsagarrien ondoriozko hilkortasun-arriskua murriztu dezakete

Ontzi, lata eta kosmetikoetan dauden disruptore endokrinoek (substantzia kimikoak, alegia) osasunean duten eragina aztertu du nazioarteko ikerlan batek, eta, ondorioztatu duenez, gorputzean D bitamina eta folato maila altua izateak plastiko kutsagarrien ondoriozko hilkortasun-arriskua murriztu dezake.

The Lancet Planetary Health aldizkarian argitaratutako lanak azpimarratzen du odolean D bitamina eta folato maila handia izateak babestu gaitzakeela horrelako kutsatzaile kaltegarrien aurrean.

Ikerlanak 8.000 helduren baino gehiagoren datuak aztertu ditu, batez beste 8 urtean bildutakoak. Emaitzek erakutsi dute plastiko kutsagarrien eraginpean izan direnen hilkortasun-arriskua handiago dela; izan ere, % 35 aukera gehiago dute edozein kausagatik hiltzeko; % 73 gehiago, minbiziak jota hiltzeko, eta % 89 aukera gehiago gaitz kardiobaskularren ondorioz hiltzeko. Zehaztu dutenez, Estatu Batuetan soilik, horrelako kutsatzaileen ondorioz 256.471 lagun hil dira. 

Datuokin, ikertzaileek ondorioztatu dute kutsagarri horiek 256-417 lagun hiltzea eragiten dutela urtean, AEBn.

Dieta osasungarria, babes gisa

Ikerketaren arabera, plastikoen eraginpean egotearen eta hilkortasun-arrisku handiagoaren arteko lotura odolean D bitamina eta folato maila gutxi dutenen kasuan baino ez da atzeman. Aurkikuntza horrek bidea ireki du ingurumen-kutsatzaile horien ondorioei aurre egiteko ikerketak bideratzeko.

Testuinguru horretan, elikagai ultraprozesatuak ahalik eta gutxien kontsumitzea gomendatu dute ikertzaileek; izan ere, jan horiek ez dira elikagarriak, eta, are gehiago, aztertutako kutsatzaileen iturri ere badirelako.