La Sallek "barkamena" eskatu die Patxi Ezkiagaren biktima guztiei

Arartekoak aste honetan egin du publiko La Salle Ikastetxean 1976 eta 2021  bitartean Patxi Ezkiaga Lasa irakaslearen sexu-abusuen biktima izan zirenekin eta ikastetxearekin berarekin egindako lanketa prozesuaren emaitzen txostena. Horren hitzetan, La Salle ikastetxeak bana-banako erreparazio bide bat abiatuko du, biktimek eta Arartekoak berak proposatutako erreparazio kolektiboaren ordez.

Horren aurrean izan diren argitalpen eta iritzien aurrean, oharra argitaratu du Irungo La Salle Ikastetxeak, eta “barkamena” eskatu die biktima guztiei, “bizi izandako sufrimenduagatik eta une hartan gertatutakoa prebenitzen edo detektatzen jakin ez zuelako”.

 “Argi eta garbi adierazi nahi dugu gertatutakoa gaitzesten dugula. Jokabide onartezinak dira, biktimei kalte sakona eta sufrimendu bidegabea eragin zietenak”, dio zuzendaritzak oharrean, eta honakoa gaineratu du: “Badakigu ezein hitzek ezin duela eragindako mina erabat erreparatu, baina uste dugu kaltea aitortzea eta barkamena eskatzea erantzukizun moral eta instituzionaleko ezinbesteko urratsa dela”.

Bertan azaldu duenez, erakundeak topaketa pertsonalak izan ditu eurengana jo nahi izan duten biktima batzuekin; “entzute sakoneko eta jarduteko modurik onenari buruzko hausnarketa uneak” izan dira, erakundearen hitzetan, “instituzionalki eskaintzeko betebeharra dugun kontsolamendua ematen lagundu ahal izateko”.

Arartekoak txosten horretan aurreratu duenez, La Sallek esan du “topaketa pertsonal eta erreparatzaileari” ekin diola, “hizpide duguna bezalako kasuak erreparatzeko, gotzain-konferentziaren, agintarien eta gobernu zentralaren [Espainiakoa] artean adostutako prozeduretara jo duten biktimekin”.

Prozedura indibidualetara jotzeko erabakiak biktimen etsipena eta ezinegona eragin duten jakitun, erreakzio horiek “errespetuz eta arretaz entzuten” dituztela adierazi dute, eta biktimekin elkartzeko biderik onena aurkitzeko “arduraz hausnartzen” ari dela La Salle, “elkarrizketa-guneak indartuz eta aitortzarako eta erreparaziorako modu egokiagoan lagun dezaketen formulak aztertuz”.

Halaber, “zubiak eraikitzeko, topaketa-bideak bilatzen jarraitzeko eta eragindako mina aitortzeko bidean aurrera egiteko” borondate argia erakutsi du oharrean.

La Sallek azpimarratu duenez, “nabarmen indartu ditugu prebentzio-protokoloak, babes-neurriak eta zaintzari buruzko prestakuntza-prozesuak”, euren ikastetxeak ikasle guztientzako “ingurune seguruak, babesleak eta konfiantzazkoak” direla bermatzeko.

“La Sallek arduraz eta umiltasunez lan egiten jarraituko du barkamena eskatzeko, elkarrizketarako guneak irekita edukitzeko eta, ahal den neurrian, zauriak sendatzen lagunduko duten aitortza eta topaketa moduetarantz aurrera egiteko”, azaldu du.

Biktimen salaketak eta Arartekoaren prozesua

Donostiako La Salle Ikastetxean 1976 eta 2021 bitartean Patxi Ezkiaga Lasa (2018an zendu zen) irakaslearen sexu-abusuen biktima izan zirenen erreparazio kolektiboari atea itxi dio La Salle ikastetxeak, Arartekoak aste honetan publiko egin duen azken txostenaren arabera.

2024ko maiatzean egin zen publiko lehen kasua, gero beste 26 biktimen testigantzak etorri ziren, eta Ezkiagak egindako abusuez gain, La Salleko arduradunek, jokabide horien jakitun izan arren, ezer ez zutela egin salatu zuten biktimek. 

Arartekoaren txostenak jaso duenez, biktimekin nahiz La Salle ikastetxearekin hainbat elkarrizketa egin ondoren, Arartekoak biktimekin batera adostutako erreparazio kolektiborako proposamena egin zion La Salleri, baina horrek, biktimen mina aitortu arren, uko egin dio iraganeko arduragabekeriazko jarrera publikoki aitortzeari eta erreparazio kolektiboari.

Urtarrilaren hasieran, La Sallek Arartekoari bidalitako gutunean, irmo adierazi zion Espainiako Gotzainen Konferentziak duen PRIVA barne-protokoloaren alde egiten zuela, kasuak banan-banan aztertzeko, erreparazio kolektiboaren aukerari bidea erabat itxiz.

Horrek biktimen artean sumina eta atsekabea eragin du, jasandakoaren aitortza publikoa nahi eta behar baitzuten, Ezkiagaren abusuek eragindako zauri psikologikoak zabalik baitituzte oraindik ere.