2025ean, Osakidetzak iraungitako 274 txerto eman zituen Euskadiko 13 ESIetan

Osakidetzak iraungitako 274 dosi eman zituen 2025ean, 21 motatakoak, eta dosi horiek Euskadiko 13 Erakunde Sanitario Integratuetako (ESI) zentroetan jarri ziren; hau da, EAEko guztietan.

Kopuru 2024an jarri ziren iraungitako 7 txerto gehitu behar zaizkio, zehazki Uribe ESIan, eta 86 gehiago 2023an, gehienak (82) ESI horretan bertan; 3, Donostialdean, eta 1, Araban.

Osasun Sailak Rebeka Uberari (EH Bildu) Legebiltzarrean emandako erantzunean jasotzen dira datu horiek. Uberak eskatu zituen azken hiru urteetan Osakidetzak otsailaren 20ra arte identifikatutako iraungitako txertoei buruzko informazioa.

Iraungitako txertoen kasua argitara eman zenetik, urtarrilaren amaieran, Osasun Sailak, horien kopuruari dagokionez, hainbat datu eman izan ditu, eta zenbatekoa aldatuz joan da.

Txertoen ikerketa eta trazabilitate batzorde bat sortu zen akatsen arrazoiak argitzeko, eta martxoaren 3an jendaurrean aurkeztu zuten txostenak ondorioztatu zuen 2025ean txertoen % 99,85 behar bezala eman zirela, Alberto Martinez Osasun sailburuak nabarmendu zuenez.

Hala ere, ikerketa-batzordearen txostenak aitortu zuen hainbat akats gertatu zirela txertoen trazabilitate-faseetan, eta azaldu zuen ohikoa baino dosi gehiago eskuratzeak stocka metatzea ekarri zuela, eta, ondorioz, iraungitzear zeuden loteak erabiltzen ari zirela.

Sei hilabete baino gutxiagoko bizitza baliagarria zuten loteak ere jaso ziren (ohikoa urtebetekoa da), eta, ondorioz, txertoak azkarrago eman behar izatea eragin zuen.

Gainera, txertoak osasun-zentroetan biltegiratzeko eta banatzeko fase batzuetan, loteari eta iraungitzeari buruzko informazioa sistema partzialekin kudeatu zen.

Sailburuak adierazi zuen dosi horietako gehienak Errenteriako (Gipuzkoa) osasun-zentroan jarri zirela, Donostialdea ESIaren barruan, eta gainerako osasun-eskualdeetan kasu isolatuak izan zirela. Osasun Sailak orain EH Bilduri bidalitako datuen arabera, akats horiek ESI guztietan izan ziren.

2025ean, iraungitako txerto-kopuru handiena Donostialdeko ESIan (79) eman zuten, ondoren Bilbo-Basurtu (50), Araba (33), Uribe (32), Barakaldo-Sestao (26), Ezkerraldea-Enkarterri-Gurutzeta (18), Goierri (10), Tolosaldea (10), Barrualde-Galdakao (6), Bidasoa (4), Debabarrena (3), Arabako Errioxa (2) eta Debagoiena (1).