Honela lehorreratuko dituzte 'MV Hondius' ontziko bidaiariak Kanarietan

Espainiako Osasun ministro Monica Garciaren hitzetan, MV Hondius ontzia igandeko 04:00ak eta 06:00ak bitartean iritsiko da Tenerifera (bertako ordua), eta Espainiako Estatuko bidaiariak izango dira lehorreratzen lehenak.

Fernando Grande-Marlaska Barne ministroarekin batera Moncloan eskaini duen prentsaurrekoan azaldu duenez, "aurreikusitako operatiboaren arabera, ontziak portuko dartsenan botako du aingura".

Garciak zehaztu du lehorreratu aurretik bidaiariei osasun azterketak egingo dizkietela, eta azterketa epidemiologikoa ere egingo diete, bidaiarien eta tripulatzaileen osasun egoera egiaztatzeko.

Ministroaren esanetan, "pixkanaka eta antolatuta" aterako dira bidaiariak ontzitik, eta espainiar herritarrak izango dira ontzitik irteten lehenak.

Babes-neurriak  

Ministroak lehorreratu aurretik hartu beharreko babes-neurriak azpimarratu ditu, eta erantsi duenez, "bidaiari guztiak FP2 maskara batekin aterako dira, prebentzio-neurri gehigarri gisa". 

Ekipajean ere murrizketak izango dituzte bidaiariek: "eskuko maleta txiki bat, dokumentazioa, sakelako telefonoa, kargagailua eta oinarrizko gauzak soilik eraman ahal izango dituzte".

Bestalde, Garciak argitu du "ekipajearen zati bat" eta hildako pertsonaren gorpua ez direla Kanarietan lehorreratuko, eta ontzian geratuko dira tripulazioko kide batzuekin batera.

Ministroaren hitzetan, ontzia Herbehereetara abiatuko da bidaiariak bertan utzi ondoren, eta "desinfektatzeko eta gainerako materiala kudeatzeko prozesu osoa Herbehereetan egingo dute, nazioarteko protokoloei jarraituz".