Bi gidari hil dira istripuz astearte honetan Nafarroan

Bi pertsona hil dira astearte honetan Nafarroako errepideetan, bi zirkulazio-istriputan. Lehenengoa 56 urteko motozale nederlandar bat izan da, Izaban, motorretik erorita. Bigarrena, 60 urteko gizon bat, N-135 errepidean, Esteribarren, errepidetik irtenda.

Guardia Zibilak jakinarazi duenez, NA-137ko 53,2 kilometroan gertatu da lehenengo istripua, Izaban. Motozikleta bidetik atera da.

Guardia Zibilak 13:24an jaso du istripuaren berri, eta gertatutakoa ikertzeaz arduratzen ari da.

Handik denbora batera, 16:51n, SOS Nafarroaren 112 Larrialdiak Kudeatzeko Zentroak Esteribarren izandako ezbehar baten berri jaso du, eta Cordovillako suhiltzaileak, oinarrizko bizi-euskarriko anbulantzia bat, bizi-euskarri aurreratuko anbulantzia bat (medikalizatua) eta Foruzaingoaren patruilak bertaratu dira.

Ezbeharra N-135 errepideko 14. kilometroaren parean gertatu da (Iruñea-Frantzia, Luzaide), Idoi parean, Esteribar udalerriko kontzejuan. Ezponda batetik erori eta zubi baten azpian geratu da autoa, bidetik aterata.

Larrialdi-zerbitzuak iritsi direnean, gidaria, 60 urteko gizonezko bat, hilda zegoen istripuaren ondorioz.

Foruzaingoko Argiketen Brigadako agenteak ezbeharraren nondik norakoak ikertzen eta eginbideak bideratzen ari dira.