76 urteko gizon bat atxilotu dute Hondarribiko Donejakue Bidean emakume erromesei sexu-abusuak egiteagatik

Ertzaintzak 76 urteko gizon bat atxilotu du Hondarribian, Donejakue Bidea egiten ari ziren hainbat emakumeri ustez sexu-abusuak egiteagatik. Atxilotua hizketan hasten zen erromesekin eta musu eta besarkadak ematen zizkien, horien borondatearen aurka. 

Segurtasun Sailak jakinarazi duenez, joan den astean Ertzaintzak Done Jakueren iparraldeko bidea egiten ari zen atzerriko erromes baten salaketa jaso zuen. 

Biktimak azaldu zuenez, gizon bat hurbildu zitzaion landa eremu batena eta parean jarri zitzaion, eta elkarrizketa labur baten ondoren, musu ematen hasi zitzaion, haren baimenik gabe, harik eta ihes egin eta bidea jarraitu ahal izan zuen arte.

Ikerketak egin ondoren, Ertzaintzak jakin zuen ekainaz geroztik gutxienez beste zazpi emakumek jasan dituztela gisa horretako abusuak inguru berean, antzeko ezaugarri fisikoak zituen pertsona batek eginak. Kasu guztietan, biktimak emakume atzerritarrak ziren, Hondarribian bakarrik zebiltzanak. 

Kalez jantzita zeuden agenteek zaintza-dispositibo bat ezarri zuten inguruan, eta susmagarria ikusi zuten. Horren deskribapena bat zetorren biktimek emandakoarekin, eta, gainera, ikusi egin zuten erromesek salatutako gertaera berberak egiten saiatzen. Hori dela eta, atxilotu egin zuten.

Atxilotua ertzain-etxera eraman zuten, beharrezko eginbideak egiteko, eta datozen orduetan epailearen esku utziko dute. Polizia-etxean ikerketa-lanak egiten ari dira biktima gehiago identifikatzen saiatzeko.