Cebada Gago ganadutegiko zezenek adarkatu bat utzi dute entzierro azkar batean

Cebada Gago ganadutegiko zezenak protagonista izan dituen 2026ko sanferminetako bigarren entzierroa azkarra izan da. Arriskutsu ospeari omen eginez, gizon bat adarkatu dute besoan, Telefonica parean. Zezenek 2 minutu eta 26 segundo behar izan dituzte bidea egiteko.

Taldea bat eginda eta abiada bizian abiatu da Santo Domingoko aldapan gora, joaldunak buruan zirela. Ubel koloreko zezen batek ezkerretara begiratu badu ere, ez du korrikalarien aurka egin. 

Azkar batean iritsi dira udaletxe plazaraino. Zati horren amaiera arrisku uneren bat bizi izan da, hain zuzen ere, zezenetako batek korrikalari baten aurka egin duenean. Azken horrek beste korrikalari batekin estropezu egin du eta zezenaren adarrak bizkarrean ukitu dio, itxuraz, ondoriorik gabe. 

Mercadereseko zatia igarota Estafeta kalean sartu dira zezenak. Tarte horretan animaliak pixka bat sakabanatu egin dira eta korrikalariek zezenen aurrean lasterka egiteko aukera izan dute. Zezen bat erori egin da, baina segituan altxa da eta bere kideekin batera jarraitu du bidea. 

Telefonicako zatian ere eroriko asko gertatu dira eta kalezulora iritsi aurretik, zezen batek korrikalari bat kolpatu du. Zezen plazaren sarreran, zezen bat erori egin da, baina altxatu eta besteekin batera egin du ukuilurako bidea. 

Osasun arduradunek jakinarazitako balantzearen arabera, hiru pertsona zauritu dira sanferminetako aurtengo bigarren entzierroan: bata adarkatuta, kolpeekin beste biak. 

23 urteko Idiazabalgo (Gipuzkoa) mutil batek adarkada jaso du besoan, Telefonicako zatian, eta Nafarroako Unibertsitate Ospitalera eraman dute. Halaber, beste bi pertsona zauritu dira zezen plazan, kolpeengatik.