Zer neurri proposatzen ditu KIDS Legeak adingabeak Interneten babesteko?

Europako Batzordeak (EB) KIDS Legea proposatu du ostegun honetan, adingabeak Interneten babesteko. Testuak 13 urtetik beherakoek sare sozialetara sartzea debekatzea proposatzen du, eta 15 urte ezartzen ditu kontua izateko gutxieneko adin gisa.

Proposamenak adinaren araberako sarbide mailakatua aurreikusten du, eta plataformei eskatuko die zerbitzuak adingabeentzat seguruak direla bermatzea, zerbitzuak diseinatzen diren unetik bertatik.

Adinaren araberako sarbide mailakatua

Arauak 3 urtetik beherakoei sartzea debekatzea proposatzen du. 3 eta 13 urte bitartekoek, berriz, gurasoen edo tutoreen kontuen bidez soilik ikusi ahal izango dituzte haurrentzako bideo-edukiak.

13 eta 15 urte bitartean, adingabeek gurasoen edo tutoreen kontrolpeko kontuak erabili ahal izango dituzte, egunean ordubeteko mugarekin. 15 urtetik aurrera, berriz, kontua ireki ahal izango dute.

Neurriak sare sozialei, bideo-plataformei, Internet bidezko bideojokoei, txatbotei eta adimen artifizialeko zerbitzuei, aplikazio-dendei eta sistema eragileei aplikatuko zaizkie. Irabazi-asmorik gabeko hezkuntza-zerbitzuak eta administrazio publikoek kudeatutakoak arauditik kanpo geratuko dira.

Jakinarazpen eta scroll amaigabe gutxiago

Proposamenak, gainera, "diseinatzen denetik bertatik segurtasuna" bermatzeko betebeharrak ezartzen ditu 18 urtetik beherako guztientzat. Besteak beste, edukiak etengabe ikusten ibiltzea (scroll) eta lo egiteko orduetan jakinarazpen automatikoak bidaltzea debekatzea proposatzen du.

Europako Batzordeak lo egiteko ordu gisa definitzen du gutxienez zortzi orduz jarraian osatutako tartea, 22:00etatik 08:00etara, tokiko orduaren arabera.

Adingabeek erabiltzen dituzten adimen artifizialeko txatbotek ezingo dituzte elkarrizketak betiko gorde. Gainera, ezin izango dute adingabeei mendekotasun emozionala eragin diezaiekeen harremanik sustatu.

Horrez gain, adingabeen profilak pribatuak izango dira hasieratik, eta geokokapena, kamera eta mikrofonoa desaktibatuta izango dituzte. Funtzio horiek 15 urtetik aurrera soilik aldatu ahal izango dira, adingabearen berariazko baimenarekin.

Zuzeneko emankizunak ere (live streaming) desaktibatu egingo zaizkie adingabeei, eta ezingo dira aktibatu baimenik gabe.

Bideojokoetarako murrizketak

KIDS Legeak Internet bidezko bideojokoetarako murrizketa berriak ere jasotzen ditu. Zehazki, adingabeek ezingo dute sari aldakorreko sistemarik, tartean loot boxik edo harrapakin-kutxarik, erabili. Europako Batzordeak dio sistema horiek jokabide konpultsiboekin eta apustuen antzeko jokabideekin lotura dutela.

Adina egiaztatzea

Plataformek erabiltzaileen adina egiaztatu egin beharko dute kontu berri bat sortzeko, Europar Batasunaren adina egiaztatzeko sistemaren bidez.

Proposamenaren arabera, sistema horrek ez ditu nortasun-agiriak ezta datu biometrikoak ere gordeko. Hori horrela, erabiltzaileak bere adina adieraztea ez da nahikoa izango betebehar hori betetzeko.

Lehendik dauden kontuen kasuan, plataformek datu frogagarriak erabili ahal izango dituzte, hala nola kontua sortu zeneko data, eta ez da erabiltzaile guztien adina berriro egiaztatu beharko.

Proposamenak nahitaezko ikuskaritzak egitea aurreikusten ditu, eta 90 eguneko epea ezartzen du betebehar horiek betetzeari buruzko espedienteak ebazteko.