Siriako Gobernuak arma kimikoak erabiltzea egotzi die errebeldeei

Ustez, errebeldeek Damaskotik gertu erabili dituzten tunelak ikuskatu dute Siriako soldaduek eta material kimikoa aurkitu dute, Siriako telebistak jakinarazi duenez. Siriako erregimenak arma kimikoak erabiltzea egotzi die errebeldeei.

Militarrak Yobarreko tuneletan sartu dira eta elementu kimikoak aurkitu dituzte, eta horietako askok itolarria izan dute, gaineratu dutenez.

Armada errebeldeak nagusi diren Yobar auzunean indarrez sartzeko prestatzen ari da.

Asteazken honetan, arma kimikoak erabiltzea egotzi zien errebeldeek Al Assaden erregimenari.

Goi-bilera Jordanian

Hamar herrialdetako armadetako buruak Jordanian bilduko dira "datozen egunetan", Siriako krisiaren ondorioak eta kooperazio militarra aztertzeko, Jordaniako Armadako bozeramaile batek iragarri duenez.

Bozeramaileak ohar baten bidez eman du goi-bileraren parte-hartzaileen berri; Jordania, AEB, Erresuma Batua, Frantzia, Alemania, Italia, Kanada, Turkia, Saudi Arabia eta Qatar dira parte hartuko duten herrialdeak, baina ez dute datarik zehaztu.

"Topaketan azken gertaerak eta lurraldeko segurtasuna aztertzeko aukera izango da, bereziki Siriako krisia, baita Jordaniaren eta horietako zenbiaat herrialderen arteko harremanak ere".

Halaber, bozeramailearen hitzetan, bilera "aldebiko eta aldeanitzeko bileren jarraipena da, eta horien ostean topaketa gehiago egongo dira etorkizunean"; "estatu horien arteko koordinazioa sendotzeko asmoz, herrialde horietan gertatutakoa eta horrek segurtasunean izan ditzakeen eraginak".

AEB prest daude

Barack Obama AEBetako presidenteak Sirian ekintza militarrak egiteko prest egoteko esan dio Pentagonoari, Chuck Hagel Defentsa idazkariaren hitzetan. Hagelek ere iradoki duenez, isasontziak mugiarazten hasi dira prest egoteko.

Hagelek bere hegazkinean kazetariei esan dienaren arabera, Obamak agindu zehatzak eman dizkio Pentagonoari balizko ekintza militar bat prestatzeko. Horretarako AEBetako indar militarrak "birkokatu behar" dira presidenteak erabakiren bat hartzen duenerako.

"Defentsa Departamentuaren erantzukizuna presidenteari aukerak ematea da, edozein arazoren aurrean, eta horretarako gure indarrak mugitu behar ditugu, edozein aukera gauzatu ahal izateko, presidenteak aukeratu ahal izateko", gaineratu du Hagelek.

Nazio Batuen babesarik gabe, AEBetako balizko esku-hartze militarrari buruz, Obamak "zuhurtzia" eskatu du. "AEBetako Gobernuak ez du oraindik ebatzi Siriak arma kimikoak erabili ote dituen", zabaldu du Voz de America irrati-kateak.

AEBetako presidentea segurtasun nazionaleko aholkulariekin batzartu da Etxe Zurian Siriako aukera militarrak aztertzeko.

NBEren ikerketa

Siriako Iraultza eta Oposizioko Koalizio Nazionalak (CNFORS), Bashar al Assaden Gobernuaren kontrako oposiziorik nagusienak, kontrolpean dituen eremuetan NBEren ikuskatzaileen segurtasuna bermatzeko konpromisoa hartu du, asteazkenean ustez Damaskon egin zen eraso kimikoaren inguruan ikertzeko.

"NBEren taldearen segurtasuna bermatuko dugu", Jaled Sale CNFORSen bozeramaileak Istanbulen egindako prentsaurreko batean esan duenez. Saleren esanetan, "ezinbestekoa" da ikuskatzaileak "48 orduko tartea igaro baino lehen -erasoa izan zen lekura- heltzea". Oposizioaren arabera, ehunka pertsona hil ziren erasoaldi horietan.

NBEk berak eskatu dio Basar al Assaden Gobernuari ikerketa talde bat eraso kimikoak ustez egin ziren lekura heltzea erraztea.