Hegazkineko gorpuak hozkailu-tren batera eraman dituzte

Ukraina ekialdean eroritako hegazkin malaisiarreko gorpuak ezbeharraren tokitik 15 kilometrora dagoen hozkailu-tren batera eraman dituzte. Trena errusiazaleen kontrolpean dagoen geltoki batean geldirik dago, Europako Segurtasun eta Lankidetzako Antolakundeak adierazi duenez.

Hasiera batean Donetsk hirira eramango dituztela zabaldu bada ere, errusiazaleen esanetan gorpuek trenean jarraituko dute momentuz.

Dagoeneko 167 gorpu trenaren barruan daudela jakinarazi diote errusiazaleek Europako Segurtasun eta Lankidetzako Antolakundeari, erakundeak berak azaldu duenez. Halaber, behatzaileak treneko hiru bagoi ikuskatu dituztela nabarmendu dute.

Volodimir Groisman Ukrainako lehen ministrordeak, berriz, 192 gorpu eta beste zortzi gorpuzkin trenaren barruan daudela adierazi du. Horren esanetan, errusiazaleek ez dute trena mugitzeko baimenik eman. Adituen iritsiera atzeratzea egotzi die errusiazaleek Ukrainako Gobernuari eta, horien esanetan ezin dute ezer egin horiek ezbeharraren tokira iritsi arte. "Momentuz, hemen geldituko dira auzia argitu arte", adierazi du Sergei Kavtaradze Donetskeko errusiazaleen arduradunak. "Adituen zain gaude", gaineratu du.

Ukraina eta errusiazaleak ados jarri dira gorpuak mugitu ahal izateko

Kieveko agintariek eta Malaysiako hegazkinak ezbeharra izan zuen lekua kontrolpean duten errusiazaleek 298 hildakoen gorpuak lekuz aldatzea adostu dute, Vladimir Groysman Ukrainako lehen ministroordeak jakinarazi duenez.

"Aurreakordio bat lortu dugu eremu hori kontrolatzen dutenekin, hilotzak lekuz aldatzeko", esan du Grysmanek, Ukrainako Gobernuaren webgunean jaso denez.

Gauzak horrela, milizianoek baimena eman dute aditu ukrainarrek hilotzak tenperatura baxuko bagoietan eta Europako Segurtasun eta Lankidetzarako Erakundearen ardurapean garraiatzeko. "Antolakuntzaren aldetik, prest gaude ezbeharra izan zen lekutik gorpuak eramateko", ziurtatu du Groysmanek.

Bertan (Grabovo herriko landa batean, Donetsken) lanean diharduten Ukrainako erreskate zerbitzuek Amsterdam eta Kuala Lumpur lotzen zituen Malaysia Airlinesen hegazkineko 298 biktimen 192 gorpu jaso dituzte.

Groysmanek salatu duenez, aditu ukrainarrak miliziano errusiazaleen presiopean lanean ari dira.

Bestalde, bertan dauden errusiazaleek ukatu egin dituzte Ukrainako agintariek egindako akusazioak. "Ez da horrela gertatu, inolaz ere. Inork ez du erreskate zerbitzuen lana oztopatu. Europako Segurtasun eta Lankidetzarako Erakundeko misioaren ordezkariek ez dute kexarik izan", Serguei Kavtaradze liderretako baten esanetan.

Gorpuak Donetskera

Errusiazaleek, halaber, onartu egin dute zenbait hilotz Donetskera eraman izana. Kavtaradzeren azalpenen arabera, milizianoek ez zuten beste aukerarik izan, eta herri horretako kaleetan eta etxe partikularretan zeuden gorpuak eraman zituzten.

"Herriko kaleetan zehar, etxeetako patioetan, eta etxe batzuen barruan ere zeuden gorpuzkiak jaso ditugu. Ezin genituen han utzi, osasunaren ikuspuntutik. Hilotzak Donetskera eraman genituen, eta han jarraituko dute adituak heldu arte", esan du Kavtaradzek.

Kutxa beltza Malaysiari dagokio

Najib Razak Malaysiako lehen ministroak gogorarazi duenez, Malaysia da kutxa beltzaren jabea eta berari dagokio berreskuratzea, bertoko zenbait hedabideren arabera.

"MH17 hegaldiko kutxa beltza berreskuratzeko prozesua Hegazkintza Zibileko Nazioarteko Organizazioaren nazioarteko legeen araberakoa izan behar da". Malaysiari dagokio berreskuratzea, bera baita kutxa beltzaren jabea", azpimarratu du Najibek.

Lehen ministroa atzo bildu zen biktimen senideekin eta, esan duenez, Malaysiako talde bat Ukrainan da dagoeneko, istripua izan den lekura heltzeko asmoz.