Tsiprasek berretsi egin du Zipren troika ordezkatu beharra dagoela

Alexis Tsipras Greziako lehen ministroak berriz ere esan du Zipren egindako aurreneko bisita ofizialean, “troika (Europako Batzordea, Europako Banku Zentrala, Nazioarteko Diru Funtsa) ordezkatu beharra” dagoela, Europak “arnas hartu” behar duelako.

“Uste dut troika ordezkatzeko unea dela, Europak arnasa hartu behar duelako. Troikak kritika handiak jaso ditu, zilegitasunik ez izatearren. Ordezkatzea aurrerapauso handia litzateke Greziaren eta Europaren onerako”, esan du Tsiprasek, Nikos Anastasiadis Zipreko presidentearekin batera egindako prentsaurreko batean.

Tsipras gaur goizean heldu da Ziprera, atzerrira egindako lehen bilera sorta ofizialean. Aspaldiko ohitura da Greziako presidenteek Zipren egitea lehen bisita ofiziala.

Anastasiadis, halaber, bat etorri da Tsiprasekin troika ordezkatu beharra dagoela, “erreskate egoeran dauden herrialdeentzat gauzarik onena litzateke”.

Tsipras eta Anastasiados Europako arazoez eta bi herrialdeen arteko harremanaz hitz egiteko asmoz egin dute bilera. Gainera, bi gobernuek Turkiarekiko duten jarrera izan dute mintzagai. Izan ere, Turkiaren kontrolpean dago Zipre uhartearen heren bat. Hala, lehen bidaia honekin hasi du Tsiprasek Europako bira ofiziala, Italiara eta Frantziara bisita egin baino lehen.

Tsiprasek 08:00etan hasi du lanaldia, Larnacako aireportura heldu denean, han Ioannis Kassulidis Kanpo Arazoetarako ministroak harrera egin baitio, Nikos Anastasiadis presidente zipretarrarekin bildu baino lehen.

Tsiprasen bisitak ikusmin handia piztu du bertoko hedabideetan (Greziaren aldekoen eta Zipreren aldekoetan), bereziki, troikarekiko izango duen jarrera dela eta. Ziprek ere jaso zuen Troikaren plan bat.

Bilera Londresen

George Osborne Britainia Handiko Ekonomia ministroa Yanis Varufakis Greziako Finantza ministro berriarekin bildu da gaur. Varufakis Greziako zorraren gaineko plan berrirako babes bila ari da.

Gaur zabaldutako ohar baten arabera, Osborne pozik azaldu da Downing Street kaleko 11. zenbakiko (Gobernuaren egoitza) bileragatik, Syrizak hauteskundeak irabazi eta egun gutxira.

“Yanis Varufakisekin aurrez aurre egoteko aukera, hauteskundeak izan eta gutxira, oso positiboa da, ekonomia europarraren egonkortasunaren inguruan eta susperraldia sustatzeko moduez hitz egiteko”, esan du Ekonomia ministro britainiarrak.

Greziak neurri-sorta zehatza aurkeztuko du 'troika'ren aurrean hilabete amaieran

Yanis Varoufakis Greziako Ekonomiako ministroak igande honetan jakinarazi duenez, Greziak negoziazio prozesu bat abiatuko du "troika"rekin datozen egunetan. Aurreratu duenez, ez du mailegu berririk eskatuko eta hilabete amaiera arteko epea eman dio bere buruari proposamen zehatza egiteko eta, une horretatik aurrera, beste sei asteko epea "zentzuzko akordioa" lortzeko.

Greziako eta Frantziako Finantza ministroek bilera egin dute igande arratsaldean Parisen eta, ondoren, biek batera prentsaurrekoa eskaini dute. Varoufakisek iragarri du Alemaniako agintariekin bilera bat negoziatzen ari dela, datozen 24 orduotan gorpuztuko dena, eta hasi dela Nazioarteko Diru Funtsarekin Greziaren etorkizuna eztabaidatzen.

Frantziak bere burua eskaini du Greziari zorrari buruzko akordioa lortzen laguntzeko

Michel Sapin Frantziako Finantza ministroak Greziako Gobernuarekin kolaboratzeko prestutasuna agertu du, Greziaren eta "troika"ko hartzekodunen artean zorrari buruzko akordioa bultzatzeko. Hala adierazi du Yanis Varoufakis Greziako Finantza ministroarekin bilera egin ondoren eskaini duen prentsaurrekoan.

Azaldu duenez, Frantzia Greziaren zorra arintzeari buruz hitz egiteko prest dago, baina ez, ordea, zorra baliogabetzeko.

Greziaren tokia eurogunean dago eta etorkizunean Greziarekin adostuko diren akordioek erreformei eustea jaso beharko lukete, Sapin ministroaren arabera. Hala, lehiakortasuna berreskuratzeko eta hazkundearen bideari berriz ekiteko beharra nabarmendu du.