Argindarra, osasuna eta elikagaiak promestu dizkie Tsiprasek txiroei

Greziako lehen ministro Alexis Tsiprasek gaur berretsi duenez, Greziak zorra ordaindu nahi du, eta bazkideek "gurekin negoziatu beharko dute, eskura ditugun baliabide teknikoak erabilita", horiek ere gauza bera nahi izanez gero.

"Doitasunak porrota besterik ez digula ekarri onartzen badugu, argi dago irtenbidea negoziazioen bitartez lortuko dugula", adierazi du Tsiprasek Parlamentuan Gobernuaren programa aurkezteko ekitaldian. "Greziako Barne Produktu Gordinaren % 180tik gorakoa da zorra", nabarmendu du bertan lehen ministroak.

Tsiprasen esanetan, Egonkortasunerako Hitzarmena errespetatu nahi du Greziak, "baina zorroztasuna ez da itun horren parte". "Argi utzi nahi dugu ez dugula negoziatzen gure subiranotasun nazionalarekin, ez dugu herriaren agintearekin negoziatzen", ohartarazi du.

Lehen ministroaren ustez, zorroztasunarekin amaitzeko agindua eman zuen herriak hauteskundeetan, eta, hori dela eta, "Gobernuak ez du eskubiderik programa hori luzatzea eskatzeko; zubi-programa bat eskatuko dugu negoziazioak amaitu arte, hazkunde-programa bat ere bultzatu ahal izateko".

"Askok galdetu didate hemendik 15 egunera hori posible izango ote den. Baietz erantzun diegu, zorra bezalako gaiak geroago negozia ditzakegulako", esan du.

Tsiprasek berretsi duenez, Greziako Gobernuaren asmoa da Greziaren eta Europar Batasunaren artean itun berria lortzea, "euroguneko arauak errespetatuz, baina ezinezko superabitak hitzartu gabe".

Premiazko beharrizanak asetzeko

Halaber, krisiak bereziki astindu dituen herritarrei berehalako laguntza eskaintzeko programa iragarri du lehen ministroak. Programa horrek janaria, hornidura elektrikoa eta osasun zerbitzu osoa eskainiko dizkie.

Etxebizitzei dagokienez, "Gobernuak ez du onartuko lehen etxebizitzetatik inor kaleratzerik", nabarmendu du.

Lan-erreforma

Lan arloan, horren aburuz, Greziako ekonomiak ezin da lanesku merkean oinarritu, "eskubiderik gabekoa" baita, eta berrikuntza eta teknologia behar dituela azpimarratu du. Hori dela eta, hitzarmen kolektiboa berriro ezarriko dutela, eta 2016rako gutxieneko soldata 751 eurokoa izango dela iragarri du.

Gainera, 25 urte baino gutxiagoko langileak ez baztertzeko lan-erreforma abiatzeko asmoa azaldu du. "Eskubide berdinak eta soldata bera izango dute", hitzeman du.

Erretirodunen pentsioei dagokienez, erretiro-adina ez dutela igoko eta pentsioak ez dituztela jaitsiko esan du. "2015eko amaieratik aurrera pentsio txikienak igoko ditugu", aurreratu du.

Gainera, langileen kaleratzeak bertan behera uztea erabaki du; Ministerioen garbitzaile, eskolazain eta unibertsitate-mailako funtzionarioenak, esaterako. Beraz, horiek guztiak lanera itzuli dira.

Amaitzeko, irrati-telebista publiko berria sortu eta auzo-polizia berriro abiatuko duela azaldu du.

Nazionalizatu gabe

Neurriak enpresa publikoak saldu gabe jarriko dituzte martxan. "Eutsi ezinezko zorra ordaintzeko ondare nazionalak saltzea delitua da; ez dugu gure aberastasun naturala salduko, ezta sareak edota azpiegiturak ere", nabarmendu du.

Arlo fiskalean, Tsiprasen esanetan, errenta-aitorpenerako tarteak aldatuko dituzte, urtean 12.000 eurotik behera irabazten dutenek zergarik ordaindu ez dezaten. Gainera, ustelkeria eta zerga-ihesari aurre egiteko erakunde bat sortuko du Gobernuak.

Administrazioen erreforma

Bestalde, administrazio publikoen erreforma iragarri du Tsiprasek. Lehen faseak 6 hilabete iraungo du, eta goi-kargudunen segurtasuna, hegazkinak eta ibilgailuak ordaintzeko gastuetan murrizketa handia egitea aurreikusi du.

Halaber, Gobernuak hegazkin bat salduko du (guztira, hiru ditu), auto ofiziala izateko diputatuen eskubidea aztertuko du eta ministerioen ibilgailu ofizialen kopurua ia erdira mugatuko du (egun, 7.500 auto dituzte).

Gainera, Gobernuaren Presidentetzarako lan egiten duten pertsona-kopurua erdira jaitsiko du.

Tsiprasen arabera, Gobernuaren helburuak hauek dira: "subiranotasuna berreskuratzea, Europan Greziaren ordezkaritza parekatua berrezartzea eta giza krisiari aurre egitea".