Errefuxiatuen banaketa onartu ala ez erabaki behar du gaur EBk

Hungariatik, Greziatik eta Italiatik heldu diren 120.000 errefuxiatuen banaketari babes politikoa eman ala ez erabaki behar dute Europar Batasuneko Barne ministroek astelehen honetan. Europako Batzordeak neurria iragan asteazkenean proposatu zuen. Maiatzean 40.000 asilo-eskatzaile birkokatzea eskatu zuen dagoeneko.

32.256 asilo-eskatzaile estatuen artean banatzeko konpromisoa hartu zuten EBko kideek iragan uztailean. Neurria formalki onartuko dute gaur ezohiko bilera batean. Abenduan kopurua moldatzeko borondatea berretsiko dute; izan ere, Bruselak 40.000 pertsona hartzea eskatu du.

Hala ere, 120.000 errefuxiatuen banaketa urriaren 8ra arte ez adostea espero da, baina estatu batzuek onartzeko prest dauden konpromisoak aurreratzea ez dute baztertzen.

Espainia

14.931 pertsona hartzeko prest dagoela aurreratu du Espainiak, eta baita uztailean hartuko zituela agindu zuen beste 2.749 pertsona ere.

Hala ere, 2.749ko kopuruak nahaste-borrastea sortu du bi proposamen ezberdin biltzen dituelako: 1.300 asilo-eskatzaile Europara heldu diren 40.000 pertsona eta EBtik kanpo dauden beste 1.449 errefuxiatu. Neurriek ez dute 500.000 pertsonaren etorrera masiboa praktikan motelduko.

4.288 pertsona onartzea eskatu zion Europako Batzordeak Espainiari. Ondorioz, 1.300 errefuxiatu hartzeko eskaintza horren heren bat baino ez da.

Beraz, Espainiak amore eman eta uztailean egindako eskaintzaren (1.300) eta maiatzean Batzordeak egindako proposamenaren (4.288) arteko aldea (2.988) onartzen ote duen ikusteke dago. Hala ere, erabaki hori urte bukaerara arte atzeratzea litekeena da.

Austria eta Alemania arteko tren-zirkulazioa, martxan berriro

Austria eta Alemania arteko tren-zirkulazioa igande arratsaldean eten zuten errefuxiatuen etorrera geldiarazteko. Ia-ia normaltasunez funtzionatzen ari da berriro, Deutsche Bahn (DB) Alemaniako tren konpainiak gaur jakitera eman duenez.

Salzburgo (Austria) eta Munich (Alemania) arteko tren-zirkulazioak bakarrik etenda jarraitzen du oraindik pertsonak trenbidean daudelako, DBko bozeramaile batek erantsi duenez.

Alemaniako buruzagiek bi estatuen arteko zirkulazioa etetea eskatu zuten. Neurriak ez die bakarrik errefuxiatuei eragin, turistei eta beste erabiltzaileei ere.

Alemania eta Austria arteko muga. Argazkia: EFE

Auto-ilarak

Reichenhalleko mugan, Alemaniako hegoaldean, hiru kilometroko auto-ilarak izan dira goizean. Mugetan kontrolak berriz martxan jarriko zituela iragarri zuen Alemaniako Gobernuak igandean.

Bayerischer Rundfunk Bavierako telebista publikoak jakitera eman duenez, sei kilometroko auto-ilarak izan dira Passaun.

Poliziaren arabera, autobideak errei bat gutxiagorekin geratu dira poliziek mugetan kontrolak egin ahal izateko. Bestalde, Poliziak errefuxiatuen hiru trafikatzaile atxilotu ditu Freilassingo mugan, segurtasun indarren bozeramaile batek jakinarazi duenez.

Theo Francken Belgikako Migrazio Estatu idazkariak gaur ziurtatu duenez, aldi baterako mugak ixtea ez dute baztertzen, Alemanian gertatu bezala errefuxiatuen etorrera masiboa gertatzen baldin bada.

Austriak Armada mugara bidali du

Poliziari laguntzeko Hungariako mugara Armada bidaltzea erabaki du Austriak.

Segurtasun indarren helburua errefuxiatuak kontrolatzea izango dela goraipatu du Werner Faymann Austriako kantziler federalak Vienan. Hala ere, beharrezkoa izango balitz errefuxiatuei laguntza humanitarioa eskainiko diete.

2.200 bat soldadu mugatik gertu bidaliko dituzte errefuxiatuak kontrolatzeko eta pertsonen sarrera “ordenatua” bermatzeko, Reinhold Mitterlehner kantzilerrordeak erantsi duenez.