Siria: Idlibeko gudua, atzeratuta

Bilera  luze  baten  ondoren, Errusiako  eta  Turkiako  agintariek  erreboltarien esku dagoen Idlib eskualdea, oraingoz, ez erasotzea  erabaki  dute. Giza hondamendia  saihestearren hartu dute erabaki hori, milaka zibil daudelako han.

Errusia eta Turkiako presidenteek, Putinek eta Erdoganek akordioa adostu dute, Turkiarekin muga egiten duen Idlib eskualdean gudurik ez egoteko. Erreboltarien azken  gotorlekua da Iilib, Turkiaren babesa dute, eta azkenaldian borrokan ari dira Errusiaren  laguntza duen Bashar  Al-Assaden aurka.

Hain zuzen ere, oso odoltsua izan litekeen azken erasoaldia ari dira prestatzen siriarrak eta errusiarrak. Nazio Batuen Erakundeak ohartarazi  du hondamendi humanitarioa  gerta litekeela han.

Turkiarentzat arazo larria da azken borroka hori, errefuxiatu uholdea eragin dezakeelako eta gainera, erreboltariak suntsitzeko aukera dagoelako.

Hori horrela, inguru desmilitarizatua adostu dute Putinek eta Erdoganek, 15 kilometroko zabalera duena eta Siriako eta Errusiako tropak erreboltarietatik bananduko dituena. Horrekin, azken borroka hori saihestuko lukete, nahiz eta berandu baino lehen guda iritsiko den.

Duela aste batzuk elkarrekin izan ziren Putin eta Erdogan, eta atzo ere lau orduko bilera izan zuten, non argi utzi zuten zein diren Siriako gerrako protagonista nagusiak.