Netanyahu hautetsontzietara doa

Eguberri lasaiak izan dira Palestinan. Ez da istilurik egon, eta Belenen aurreko urteetan baino askoz ere turista gehiago ibili da, ekonomia palestinarraren mesedetan.

Israelen, aldiz, gorabeherak izan dira politikaren arloan. Benjamin Netanyahu lehen ministroak erabaki du azaroan egitekoak ziren hauteskundeak apirilera aurreratzea, hain zuzen ere, Netanyahuk gehiengoa galdu duelako parlamentuan.

Aurrena, alderdi ultranazionalista batek kendu zion babesa, Hamasekin Gazan adostu zuen azken su-etena dela eta. Orain, berriz, erlijioari lotutako alderdi batek erretiratu dio babesa. Izan ere, Auzitegi Gorenak erabaki du, gazte ultraortodoxoek zerbitzu militarra egin beharko dutela, beste gazte israeldar guztiek bezala. Baina, gainera, ustelkeria kasu pare bat gainean dituelako ere aurreratu ditu hauteskundeak Netanyahuk.

Oso litekeena da inputatua izatea, eta horregatik, ez du azarora arte itxaron nahi hauteskunde mahaiak jartzeko: hauteskundeak irabazi nahi ditu, afera auzitegira iritsi aurretik. Eta inkesta guztiek faboritotzat jotzen dute.