40 urte ayatollah deiturikoek Irango agintea hartu zutenetik

Gaur berrogei urte, Jomeini ayatollah Iranera itzuli zen Parisko erbestetik eta Persiako Sha Reza Pahlevi bota zuen iraultzaren buru jarri zen. Iraultza horretan mota askotako jendeak parte hartu zuen, liberaletatik hasi eta komunistetaraino, erregea bota eta demokrazia ezartzeko helburua zuten; baina iraultza hori ayatollah izeneko horiek bahitu zuten.

Militarren babesarekin, emakumeak behartu zituzten gorputza erabat estaltzera eta erlijioa bizitza sozial eta politikoaren erdigune bihurtu zuten. Iraultzan protagonista izan ziren asko urkatu egin zituzten edo erbestera joan beharra izan zuten; komunisten aurkako errepresioa bereziki ankerra izan zen. Iraultzaren buruzagi gorena deitua, Persiako errege berria bihurtu zen: Lehenik Jomeini eta ondoren, hau 1989an hil zenean, Jamenei, gaur egun oraindik agintzen jarraitzen duena, Jomeinik berak aukeratu zuen.

Hauteskundeak egiten dira bai, baina sistema diseinatua dago hauteskunde auzitegiek baliogabetu ditzaten mehatxu jotzen diren hautagaitzak. Eta gainera, presidenteren batek erreformaren bat egin nahi badu, buruzagi gorenak galarazten dio eta kargugabetu ere egin dezake.

Laburbilduz, diktadura bat da eta gainera erlijio musulmanaren agindu kontserbadoreenak ezartzen ditu. Eta, gazteen artean babes falta eta haserrea dagoen arren, beste berrogei urtez irautea pentsatzen du.