Netanyahu, inguratuta

Israelgo hauteskundeak apirilaren bederatzian egingo dira. Testuinguru horretan, fiskaltzak Benjamin Netanyahuren kontra egindako akusazioak direla medio, hauteskunde kanpaina irauli egin da.

Netanyahu da hauteskundeak irabazi eta botereari eusteko hautagairik sendoena, baina gauzak aldatu egin daitezke fiskaltzak ustelkeria eta boterearen neurrigabeko erabilera egotzi dizkionez.

Netanyahuren kontrako epaiketa ez da hauteskundeak baino lehen abiatuko, baina gobernu berria osatzeko negoziaketetan harrapa dezake. Israelen ohikoa da lau, bost edota sei alderdiren arteko koalizioak osatzea, eta Netanyahu ahul azaldu daiteke elkarrizketa horiek gidatzeko. Era berean, Israelen nazioarteko irudia ezbaian jarri du Nazio Batuen Giza Eskubideen Kontseiluak kaleratutako txostenak. Horren arabera, errepresioari bidea eman dio Israelek Gazan. 189 zibil palestinarren heriotza ikertu dute, eta euren ustez, soldadu israeldarrek hiltzeko asmo osoz egin zieten tiro. Ondorioz, gerra krimenak izan daitezkeela salatu dute. Dena den, batzorde horrek egin izan ditu gisa bereko txostenak, eta Israelgo gobernuak ezin dezake esan ohituta ez dagoenik.