Gero eta ultra gehiago Europan

Europako ultraeskuindarrentzat honakoak garai onak direla baieztatu du Finlandian, eskuin muturreko "Benetako finlandiarrak" alderdiak, joan den igandeko hauteskundeetan lortu zituen emaitza onak. Eskuin-muturra deitzen diogunaren barruan, badaude kutsu faxista duten alderdiak, baina gutxiengoak dira. Europako ultraeskuindarrak lotzen dituena immigrazioaren aurkako jarrera da; oro har, eta bereziki musulmanen aurkakoa. Subiranotasuna ere berreskuratu nahi dute; euren arabera, Europar Batasunak kendu diena.

Duela hamarkada bat salbuespena ziren haiekin akordiotara iritsi nahi zuten alderdiak. Orain, ordea, hauteskundeetako emaitza onek beharrezko bihurtu dituzte gobernu-koalizioak osatzerakoan. Horregatik daude Norvegiako, Austriako eta Danimarkako gobernuetan, eta beste zenbaitetan sartzeko puntuan izan dira.

Alderdi hauek botoen % 20 baino gehiago eskuratzen dituzte Austrian, Italian eta Frantzian, eta % 10etik gora, Alemanian eta Eskandinaviako herrialde guztietan. Maiatzeko hauteskundeak aukera bikaina dira eurentzat, eta Europako Parlamentuan hirugarren indarra izateko helburua dute.