Ukraina NATOn sartuz gero, Errusiaren eta Aliantza Atlantiarraren artean gerra izan daitekeela esan du Putinek

Ukraina NATOn sartzen bada, Errusiaren eta Aliantza Atlantiarraren gerra bat izan daitekeela ohartarazi du gaur Vladimir Putinek.

Presidente errusiarra Viktor Orban Hungariako lehen ministroarekin bildu da Moskun, eta ondoren biek agerraldi bateratu egin dute.

"Imajina dezagun Ukraina NATOn sartzen dela eta (Krimeako penintsula kontrolpean hartzeko) operazio militarra abiatzen duela. Zer egingo dugu guk? NATOri aurre egin? Norbaitek pentsatu al du horretan? Badirudi ezetz", adierazi du Putinek.  

Aurrez Polonian edo Errumanian egin zuen bezala, NATOk Ukrainari armamentu modernoa ematen badio, herrialde horrek Krimea eta Donbas eskualdea indarrez hartzeko hautua egin dezakeela uste du Putinek.

Ildo horretan, gogora ekarri du Errusiarentzat Krimea bere lurraldean dagoela eta auzi hori "itxitzat" ematen duela.

Horrez gain, esan du ez dela egia NATOren ateak herrialde guztientzat irekita daudela. "Nondik atera da hori? Non dago idatzita? Inon", azpimarratu du.  

Halaber, azaldu du NATOren sorrerako agiriaren 10. artikuluan jasota dagoela herrialde bat Aliantzan sartzeko erakunde horretako kide guztien oniritzia beharrezkoa dela.  

"Sarrera onartu ahal da, baina ez dago derrigortuta. Estatu Batuek eta NATOk esan dezakete Ukraina sartuta gure segurtasuna bermatu nahi dutela. Errespetatzen dugu Ukrainaren helburua, baina ezin dugu onartu, guk beste betebehar batzuk ditugulako nazioartean. Zer da Ukrainak ulertzen ez duena?", galdetu du.

"Prozesu honetan nahasita gauden herrialde guztien segurtasuna eta interesak bermatu dira, Ukrainarenak, Europako herrialdeenak eta Errusiarenak. Baina horretarako ezinbestekoa da gure proposamenak seriotasunez aztertzea", gaineratu du.

Bestalde, Estatu Batuek Ukraina Errusiaren garapena saihesteko "tresna" gisa erabiltzen dutela salatu du.

"Errusia gatazka armatu batera bultzatuz eta Europar Batasunak zigor gogorragoak ezarrita, edo Ukraina NATOn sartuta ultraeskuindarrei Donbasen eta Krimean indarrez sartzeko hauspoa emanda, gatazka armatu batera eramango gaituzte", ohartarazi du.   

Putinek berretsi egin du "herrialde guztien interesak", Errusiarenak barne, kontutan hartzea izango dela gerra bat ekiditeko modu bakarra.

Hala ere, orain arte, Estatu Batuek eta NATOk Errusiako Gobernuak helarazitako "kezka nagusiei" jaramonik egin ez diela salatu du.  

"Estatu Batuek eta NATOk idatziz emandako erantzuna zorrotz aztertzen ari gara. Baina, oraingoz behintzat, gure kezka nagusiak baztertu egin dituzte", deitoratu du.