NATOko hainbat herrialde, Ukrainari eurek bidalitako armak erabiltzeko baimena ematetik gertuago
NATOko hainbat herrialdek bidea zabaldu diote Ukrainari eurek bidalitako armak erabilita Errusian dituen helburuen aurka jotzeko. Gai horrek, baina, zatituta ditu Ipar Atlantikoko Itunaren Erakundeko (NATO) aliatuak AEBk Ukrainari horretarako argi berdea eman dionetik.
"Nazioarteko legea betez eta modu arduratsuan egitea nahi dugu", esan du Aliantzako idazkari nagusi Jens Stoltenbergek komunikabideen aurrean, Atzerri ministroek bilera egin aurretik.
Czernin jauregian, Txekiako Atzerri Ministerioaren egoitzan, bildu dira gaur, Washingtonen uztailean aliatu guztiek egingo duten goi-bilera prestatzeko. Aurreikusi dutenez, udan egingo duten batzar horretan onartu nahi dute NATOk eginkizun handiagoa izatea armen eta munizioen horniketa koordinatzeko orduan. Halaber, finantza konpromiso berri bat adostea bilatuko dute.
Bestalde, Ukrainaren eskariari emango diote lehentasuna hitzordu horretan. Hain zuzen ere, Ukrainak horiek bidalitako armak erabiltzeko baimena eskatu die, Errusiak Kharkiven kontrako erasoak areagotu dituela arrazoituta. AEBk, bere aldetik, onartu egin du eskaera, betiere, "armak eskualde horretan soilik erabiltzen badituzte".
Ekimena babesten duten herrialdeak
Joe Biden presidentearen Administrazioko iturrien arabera, AEBk baimena eman dio Ukrainari Errusiako Federazioaren barruan dauden helburu militarrei eraso egiteko, betiere Errusiako Armadak Kharkiv eskualdeari erasotzeko erabiltzen duen eremutik irteten ez bada, Ukraina ipar-ekialdean eta Errusiarekin mugan dagoena.
Volodimir Zelenski Ukrainako presidenteak esan du Etxe Zuriaren onespenaren berri jaso duela, eta pozik agertu da erabakiarekin; izan ere, "helburua lortzeko aurrerapausoa da, mugako lerroan dauden herrietan bizi den jendea defendatzeko aukera emango digulako".
AEBz gain, NATOko zenbait kide ere Ukrainari Errusian armak erabiltzen uztearen alde agertu dira. Besteak beste, Polonia eta Suedia dira horren aldekoak, betiere defentsa propioa nazioarteko zuzenbide humanitarioa errespetatuz egiten bada.
Alemania horren aldekoa izango litzateke, baldin eta Ukrainako herritarrak eta azpiegitura zibilak defendatzeko erabiltzen bada.
Estonia zehatzagoa izan da, honakoa esan baitu: "Ukrainak bere burua babesteko armak erabiltzeko eskubidea du, baita Errusian ere, behar izanez gero, helburua azpiegitura militarrak edo estrategikoak direnean".
Letoniak eta Herbehereek Nazio Batuen Gutuna ekarri dute ahora. Gutun horren azterketa juridiko eta politiko zehatzetik ondorioztatu dutenez, Ukrainak eskubidea du "Errusiako indarrei ez soilik Ukrainan erasotzeko, baizik eta baita Errusiako lurraldean ere, bidezko helburu militarrak jotzeko", Letoniaren arabera. Herbehereetako ministroaren hitzetan, defentsa propioari dagokionez, "ez dago muga geografikorik armen erabileraren gainean".
Beste potentzia batzuk
Ukrainari eman dizkioten armak Errusian erabiltzearen aurkakoak dira Italia, Espainia eta Finlandia, arrazoi ezberdinengatik bada ere.
Guido Crosetto Italiako Defentsa ministroak ostiral honetan esan duenez, Ukrainak Errusian armamentu italiarra erabiltzea Italiako Konstituzioaren aurkakoa da, eta Kievek Errusiako lurraldeari mendebaldeko herrialdeek emandako armekin eraso egitearen aurka dagoela berretsi du. Crosettok azpimarratu duenez, Italiak bidalitako armak "Ukraina defendatzeko baino ezin dira erabili; horrek barne hartzen du errusiarrei Ukrainan erasotzea, baina ezin dira beste herrialde batean erabili". Izan ere, Bigarren Mundu Gerra amaitu zenetik, Italiako Konstituzioak bere 11. artikuluan debekatu egiten du beste herrialdeen kontra egitea. Besteak beste, honakoa dio: "Italiak gerra gaitzesten du, gainerako herrien askatasunaren aurkako eraso-tresna gisa eta nazioarteko eztabaidak konpontzeko bitarteko gisa".
Bestalde, Jose Manuel Albares Espainiako Atzerri ministroak esan du Ukrainak ez duela baimenik eskatu Espainiak emandako armak Errusian erabiltzeko, eta, beraz, emandako materiala "Ukrainak bere burua defendatzeko eta bere lurraldea defendatzeko" da.
Finlandiako ministroak, Elina Valtonenek, Ukrainaren aireko defentsen beharra azpimarratu du, Ukrainako azpiegitura zibil eta energetikoari kalte gehien egiten dieten erasoak Errusiako mugaren beste aldetik baitatoz. Ez du zehaztapen gehiago egin.
Zure interesekoa izan daiteke
Seguro sozialistak irabazi du Portugalen, hauteskunde presidentzialen bigarren itzulian, botoen % 65,77 lortuta
Ventura ultraeskuindarrak, berriz, botoen % 34,13 lortuko lituzke, botoen % 98 zenbatuta. Herri batzuek hauteskundeak astebete atzeratzea erabaki dute, otsailaren 15era arte, herrialdeak azken bi asteetan jasan dituen denboraleen ondorioz.
Irango auzitegi batek zazpi urte eta erdiko kartzela-zigorra ezarri dio Mohammadi Bakearen Nobel saridunari
Starmerren aholkulari nagusiak dimisioa eman du Epsteinen artxiboen eskandaluagatik
Kabineteko buruak bere gain hartu du Mandelson enbaxadore kargurako izendatu izanaren errua. "Akats bat izan zen. Gure alderdiari, gure herrialdeari eta politikarekiko konfiantzari kalte egin die Mandelsonek", gaineratu du.
Takaichik irabazi ditu hauteskundeak Japonian, eta gehiengoa handitu du
Hauteslekuak itxi osteko lehen kalkuluek 274 eta 328 eserleku artean eman dizkiote lehen ministroaren Alderdi Liberal Demokratikoari, gehiengo absolutua aise gaindituta.
Hauteskunde aurreratuak Japonian, azken urteetako elurte handienaren erdian
Sanae Takaichi lehen ministroak bozak aurreratzea erabaki zuen, Parlamentuan dituen babesak handitzeko asmoz. Inkesten arabera, helburua lortuko du, baina ez dira ohiko hauteskundeak izango, elurraren eraginez ordutegia aldatu behar izan baitute hautesleku batzuetan.
Istiluak izan dira polizien eta manifestarien artean Milanen, Olinpiar Jokoen aurkako protesta jendetsu batean
Poliziak ur-kanoiak eta negar-gasa erabili ditu manifestarien aurka, protestari batzuek agenteei suziriak, bengalak eta bestelako objektuak jaurti ostean. Milaka lagun bildu dira protestetan, Neguko Olinpiar Jokoak hasi eta biharamunean.
Hautagai sozialista faborito dela egingo dute hauteskundeen bigarren itzulia Portugalen igande honetan
Inkesten arabera, Antonio Jose Seguro sozialistak botoen % 67 jasoko ditu, eta Andre Ventura ultraeskuindarrak, berriz, % 32. Ekaitzak Portugalen eragindako hondamendi betean egingo dute hauteskundeen bigarren itzulia.
Trumpek % 25eko muga-zerga ezarri die Irango ondasunak erosten dituzten herrialdeei
Programa nuklearraren inguruan AEB eta Iran zeharka egiten ari diren negoziazioen ostean etorri da erabakia. Asiako herrialdeak adierazi du "hasiera ona" izan direla elkarrizketak.
Islamabadeko xiiten gurtza leku batean izandako atentatu suizida batek dozenaka hildako eta zauritu utzi ditu
Pakistango Defentsa ministroak jakinarazi duenez, bertan zeuden segurtasun zaindariek aurre egin diote erasotzaileari, baina "tiro eginez eta immolatuz erantzun du". Pakistango agintariek Afganistango talibanei eta Indiari egotzi diete erasoa.
Txinak adierazi du ez duela negoziazio nuklearretan parte hartuko, START III ituna iraungi ostean
Asiako erraldoiak dio bere gaitasun nuklearrak ez daudela Estatu Batuen edo Errusiaren parean. Etxe Zuriak salatu du Txinak nabarmen handitu duela bere ahalmen nuklearra.