AEBk altzairuari eta aluminioari ezarritako % 25eko muga-zergak martxoaren 12an sartuko dira indarrean

Donald Trump AEBko presidenteak bart sinatu du mundu osoko altzairuaren eta aluminioaren inportazioei % 25eko muga-zergak ezarriko dizkien agindua. Etxe Zuriko funtzionario baten arabera, aipaturiko muga-zergak martxoaren 12an sartuko dira indarrean.

"Hau oso garrantzitsua du Ameriketako Estatu Batuak berriro aberats egiteko", esan du Etxe Zuriko maizterrak Bulego Obalean agindua sinatzen zuen bitartean.

Bezperan, Super Bowl ikuskizunera abiatu aurretik, aparteko salneurri horiek "denei" ezarriko zizkiela zehaztu zuen Trumpek. "Sinplea da: kobratzen badigute, guk ere kobratuko diegu (...). % 130eko muga-zergak ezartzen dizkigute, eta guk ez dugu ezertxo ere kobratzen; horrek ez du horrela funtzionatzen", azaldu zuen.

Txina da, gaur-gaurkoz, altzairu eta aluminioaren munduko ekoizle handiena, eta baliteke, berak ere muga-zergak iragartzea.

Otsailaren 1ean Txinari % 10eko muga-zergak ezarriko zizkiola jakinarazi zuen presidente errepublikanoak; Kanadaren eta Mexikoren kontra ere kargak iragarri zituen, baina bi kasu horietan hilabetez atzeratu zuen neurria, mugetan kontrol gehiago ezartzearen truke.

Txinaren muga-zergak ere, indarrean

Ingurumari horretan, atzo sartu ziren indarrean Txinak AEBko zenbait produkturi % 10etik % 15era arteko muga-zerga gehigarriak. Trumpek Txinako inportazioei ezarritako kargei erantzunez iragarri zituen zergok Xi Jinpingek.

Gainera, beste bi neurri iragarri zituen Asiako erraldoiak: funtsezko mineralen esportazioaren kontrol zorrotza eta monopolioaren aurkako Googleren kontrako ikerketa bat.

Bi potentzien arteko desadostasunak konpontzeko elkarrizketak abiatuko zituztela zabaldu bazen ere, azkenean ez omen da halakorik egon eta indarrean sartu dira muga-zergak.