Israelen esku eta Gazako gainerako lurraldeetatik isolatuta geratu da Rafah

Israelgo Armadak Morag Ardatza deiturikoa amaitu dutela iragarri du larunbat honetan, Gaza hegoaldean Jan Yunisko eremua eta Rafah erabat banatzen dituen bide eta eremu militarra. Rafah beste ezein eremutatik erabat isolatuta eta indar israeldarrek inguratuta geratu da. 

"Azken 24 orduetan, 36. Dibisioko tropek Rafah eta Jan Yunis Brigadak banatzen dituen Morag Ardatzaren ezarpena osatu dute", esan dute Israelgo Indar Armatuek ohar batean. 

Bide horrekin, Rafah hiria -gerra aurretik 270.000tik gora pertsona bizi ziren eta gaur egun ehunka baino ez dira geratzen- Gazako gainerako lekuetatik isolatuta geratu da iparraldetik (Jan Yunisen mugakidea) zein hegoaldetik, non Israelek Egiptorekin muga egiten duen Filadelfiako Korridorea kontrolatzen duen.

Urrats honen ondoren, espero bezala Israelek Rafah hiria -Gazako lurraldearen % 20 inguru hartzen du- biztanlez hustutako "segurtasun eremuei" atxiki die, Israel Katz Defentsa ministroak iragarri duenez. 

Israelgo Armadak Gazako lurralde osoaren perimetroa bereganatu du dagoeneko, 800 metro eta 1,5 kilometro arteko zabalerarekin, Isiltasuna Hausten GKEren azken estimazioaren arabera. Perimetro horretan, Israelek lurra lautu du, eraikinak, etxebizitzak eta laborantzarako lurrak suntsituz.

NBEren arabera, Zerrendaren bi heren inguru bazterketa-zonen parte dira, edo nahitaezko ebakuazio-agindupean daude, Israelek martxoaren 18an bonbardaketei berriro ekin zionetik. 

Azken 24 orduetan 21 pertsona hil eta 60 zauritu ditu Israelek. Agintari gazatarren arabera, oraindik ere biktima ugari daude hondakinen azpian eta errepideetan, anbulantziak eta defentsa zibileko ekipoak iritsi ezin diren tokietan. 

Azken egunean hildakoekin, 1.563 dira guztira Israelek martxoaren 18ko su-eten akordioa hautsi zuenetik eraildakoak, eta 4.000 baino gehiago zaurituak.

Hamas talde palestinarrak 2023ko urriaren 7an Israelgo hegoaldeari eraso eta 1.200 pertsona hil eta 251 bahitu zituen. Eta Israelek erantzun gisa abiatu zuen "azken erasoaldi" gisa bataiatu zuena. 

50.000 palestinar baino gehiago hil dira ordutik Israelen erasoetan, eskualdeko osasun agintarien arabera. Biztanle gehienak lekuz aldatu dituzte eta Gazako zati handi bat hondatuta dago.

Urtarriletik indarrean zegoen su-etena bertan behera geratu ondoren, Israelek martxoan ekin zion berriro erasoari. Isrealek esan duenez, askatzeko gelditzen diren 59 bahituak askatu eta Hamas Gazatik atera arte jarraituko du kanpainak.

Hamasek dio bahituak akordio baten parte bezala bakarrik askatuko dituela eta armak uzteko egin zaizkion eskaerak errefusatu ditu. Asteburuan Hamasen ordezkaritza bat espero zen Kairon, su-eten proposamen berriak eztabaidatzeko, taldeko iturri baten arabera.

Bahitu estatubatuar baten bideoa zabaldu du Hamasek

Oraindik bahituta duten Edan Alexander soldadu israel-estatubatuarraren bdieo bat zabaldu du gaur Hamasek. Bertan, oraindik ere Gazan zergatik dagoen galdetzen du Alexanderrek, eta Israelgo lehen ministro Benjamin Netanyahuri leporatzen dio mugimendu islamiarrarekin akordiorik itxi ez izana.

"Duela hiru aste entzunnuen Hamasek ni aske uzteko asmoa zeukala, baina zuk zeuk ezetz esan eta hemen utzi ninduzun", esaten du bahitutako soldaduak bideoan. 

"Munduak eta Israelgo Gobernuak ematen didaten nazka gorenean dago. Netanyahu diktadore bat iruditzen zait, eta fisikoki zein mentalki lur jota nago", nabarmentzen du gazteak.

Gazan bizirik geratzen den estatubatuar bakarra da bera.