Leon XIV.a aita santuaren erronkak

Kardinalen arabera, Petriren ondorengoa aukeratu zuten atzo, ez Frantziskorena. Halere, ostegunean aita santu izendatu berriak, Robert Francis Prevost estatubatuarrak, Leon XIV.a izena aukeratu duenak, aita santu argentinarrak irekitako hainbat gairi egin beharko die aurre. Baina zein dira aita santu berriak aurrean izango dituen erronkak?

Batasuna

Aitasantutzaren azken 12 urteotan, eta kardinalek onartu nahi ez badute ere, bi taldetan banatutako Eliza bat ikusi da, moderatuagoa eta kontserbadoreagoa, azken hori Frantziskoren irekierekin oso kritikoa. Posizio ezberdinak batzen saiatzea estrategikoa izango da, baita sinodoaren bidetik jarraitzea ere, hau da, denek ahotsa izango duten Eliza bat eraikitzea, askok gustuko ez badute ere.

Finantzak

Konklabea prestatzeko kardinalen kongregazioetan gehien landu zen gaietako bat da. Frantziskok egindako iraultzen artean dago Vatikanoaren finantzena, eta gardentasun lan handia egin zuen Vatikanoko bankuan. Hala, aita santu berriak diru-kutxa hutsen arazoari ere heldu beharko dio, gastuak berrikusita, Elizari egindako dohaintzak nabarmen murriztu baitira.

Sexu-abusuak

Frantziskok hainbat arau ezarri zituen Elizan sexu-abusuei aurre egiteko, baina oraindik asko dago egiteko, eta biktimen elkarteek lege horiek elizbarrutietan aplikatzeko eskatu dute, baita gardentasun handiagoa Vatikanoko kudeaketan eta prozesuetan ere. Gainera, epaiketa eta ikerketa azkarragoak eskatu dituzte.

Emakumeen parte-hartzea

Frantzisko aita santuarekin ia erabat itxi zen emakumeen apaizgintzaren aukera, baina baita diakonotza femeninoarena ere. Lan horiek, adibidez, gizon laikoek egiten dituzte, eta hori Elizaren bizitzan emakumeen parte-hartze handiagoa blokeatzeko modu gisa ikusi da.

Balizko diakonotza femeninoa, botere-postuetan emakumeen presentzia handiagoarekin batera, beste erronketako bat izango da, emakume katolikoen kolektibo askok ez baitute beren eskaeretan amore emango.

Bikote homosexualen bedeinkapenak

Dokumentu batek Eliza katolikoaren baitan zatiketak sortu baditu, hori Fiducia Supplicans izenekoa izan zen, Fede Doktrinarako Kongregazioak argitaratutakoa, Elizarentzat "irregularrak" diren bikoteak, sexu berekoak barne, bedeinka zitezkeela esaten baitzuen.

Afrikako Eliza dokumentu honen aurka agertu zen, eta azalpenak eskatu zizkion Frantzisko aita santuari. Hurrengo aita santuak katolizismoa hazten ari den kontinente bateko gotzainei erantzun beharko die.

Txina eta AEB

Maila diplomatikoan, Jorge Maria Bergoglioren aitasantutzan Txinarekin apezpikuen izendapenak bideratzeko hitzarmena sinatu zen, eta berritzen joan den akordioa mugarritzat hartu zen harreman diplomatikorik ez duten bi herrialdeen arteko hurbilketarako eta katolikoak babesteko.

Hala ere, Eliza katolikoko askok ez dute onartzen Pekinek hitza izatea gotzain baten aukeraketan.

AEBrekiko eta Donald Trump presidentearekiko harremana ere gakoa izango da etorkizunean. Izan ere, Frantziskok eta Pietro Parolin Estatu idazkariak argi utzi zuten ez zetozela bat herrialde horretan migratzaileen kontra abiatutako politikekin eta nazioarteko lankidetza murriztearekin.