Israelgo Armadak tiro egin dio Europako eta beste hainbat herrialdetako diplomatiko talde bati Zisjordanian

Europako, Amerikako eta Arabiako hainbat herrialdetako ordezkari diplomatikoz osatutako talde bat tirokatu dute asteazken honetan Israelgo indar armatuek Zisjordania okupatuaren iparraldean dagoen Jenin herrian.

Palestinako Agintaritza Nazionaleko Atzerri Gaietako Ministerioak antolatutako bisita batean ari ziren parte hartzen. Tartean, Espainia, Frantzia, Italia, Kanada, Danimarka, Finlandia eta Erresuma Batuko diplomatikoak zeuden, baita hainbat hedabideetako kazetariak ere. Palestinako Atzerriko Ministerioren hitzetan, soldadu israeldarrek diplomatikoak "kikiltzea" izan dute helburu.

Nazio Batuen Elkarteak emandako informazioaren arabera inor ez da zauritu erasoan. Bisitan 30 pertsona inguru bildu dira, Palestinako lurraldeetan ordezkaritza diplomatikoa daukaten herrietako kideak.

Ordezkaritza diplomatikoa "baimendutako ibilbidetik irten" dela salatu du Israelgo Armadak eta, beraz, tiroak "ohartarazpen" gisa egin dituztela azaldu du. Israelen Defentsarako Indarrek "sortutako eragozpenak" deitoratu dituzte ohar baten bidez. Inor ez dela zauritu azpimarratu dute eta gertaera "borroka gune aktibo" batean izan dela azaldu dute.

Diplomazialariak Yeningo bidaian lagundu dituen Ahmed Al Deek Palestinako Atzerri Ministerioko kontseilari politikoak, aldiz, azaldu du ez direla hitzartutako bidetik atera eta soldaduek tiro egin zietela.

"Diplomazialariei tiro egin zieten, baina jainkoari eskerrak, inor ez da zauritu", azpimarratu du Al Deek, gertakariaren ostean telefonoz izandako elkarrizketa batean.

Nazioartearen erantzuna

Kaja Kallas EBko Atzerri Politikako goi ordezkariak "onartezina" den tiroketa ikertzeko eskatu dio Israeli Bruselatik.

Alemaniako Atzerri Ministerioak "gertakaria" gaitzetsi du. Herbehereetako Gobernuak ohartarazi duenez, diplomazialariek "euren lana egiteko aukera izan behar dute, eta mehatxu egitea onartezina da". Turkia, Egipto eta Jordaniako Atzerri ministerioek ere tiroketa gaitzetsi dute.

Portugalgo Gobernuak Israelek Lisboan duen enbaxadorea deitu du erasoaren ostean, Italiak eta Frantziak egin duten bezala, "azalpen ofizialaren" bila. Era berean, Belgikak "azalpen sinesgarriak" eskatu dizkio Tel Aviveko Gobernuari.

Yenin herria eta, bereziki, bertan dagoen errefuxiatuen gunea dira Israelen operazio militar gehien jasaten ari diren guneetako bat urtarriletik. Dozenaka palestinar hil dituzte bertan, tartean, baita adin txikikoak ere.