Israeli armak enbargatzea eta bi estatuen soluzioa onartzen ez dutenei zigorrak jartzea proposatu du Espainiak

Espainiako Atzerri ministroak proposatu du Israeli armak saltzeari utztea, Benjamin Netanyahu Israelgo lehen ministroa presionatzeko neurri gisa, Gazan egiten ari den erasoaldia gelditu dezan. 

Espainiako Atzerri ministroak 'Madrilgo Taldea'ren goi-bileraren hasieran egin du proposamen hori. Israelen eta Palestinaren arteko gatazka konpontzeko bi estatu bultzatzea sustatzen duten Europako eta arabiar 20 herrialdetako ordezkariak bildu dira igande arratsaldean Espainiako hiriburuan, EBko, Arabiar Ligako eta Konferentzia Islamiarraren Erakundearen ordezkariekin batera.

"Gaur hemen egingo dugun ezer eta esango dugun ezer ez doa Israelen eta Israelgo Estatuaren aurka", adierazi du Albaresek bilera hasi aurretik. Aitzitik, adierazi duenez, bertaratutako guztiek kontuan hartzen dituzte "Israelgo herriaren segurtasun eta bake eskaera legitimoak", eta Hamas talde terroristaren esku jarraitzen duten bahituak askatzea eskatzen dute.

"Baina Israelgo herriak duen bakerako eta segurtasunerako eskubide bera, eskubide berbera, du herri palestinarrak ere", defendatu du Espainiako ministroak, eta, "herri palestinarrak ez du zertan betirako errefuxiatuen herria izatera kondenatuta egon" gaineratu du.

Bilerara sartu aurreko adierazpenetan, Albaresek iragarri du neurri zehatzak proposatuko dituela bileran, aurrena, EBren eta Israelen arteko elkartze akordioa berehala etetea, giza eskubideen errespetuari buruzko 2. artikuluari jarraiki.

"Denok jarri behar dugu abian armen enbargoa, ezin zaio armamenturik saldu Israeli", gaineratu du. Gainera, herrialdeek nahiz EBk dituen tratu indibidualen zerrendak berrikusteko eskatu die. 

Horrez gain, biltzarkideei eskatuko die ekainaren 17ko Nazio Batuen Konferentzia Palestinako Estatua aitortzeko "mugimendu handia" izatea, eta oraindik aitortu ez dutenek hala egin dezaten. 

"Gaur hemen bildutako guztiok nahi dugu Israel Gazan egiten ari den gerra bidegabe, zital eta gizagabea amaitzea, laguntza humanitarioari ezarria dion blokeoa altxatzea eta, behingoz, bi estaturen konponbidearen aldeko pausoak ematea", esan du Albaresek, eta nabarmendu du gertaeren aurrean isiltzea "konplize" izatea dela.

'Madrilgo Taldea'ren bigarren bilera honetan, hogei bat herrialde arabiar eta europarretako atzerri ministroak bildu dira, eta, besteak beste, Alemania, Erresuma Batua, Frantzia, Italia eta Brasil izan dira bertan ordezkatuta.

Trump konbentzitu

Barth Eide Norvegiako Kanpo Arazoetako ministroak gaurko ekimena goraipatu du, eta esan du haren ustez orain Trumpen Administrazioa "konbentzitu" behar dela, "Abrahamen Akordioa gauzatzeko bere ideia nagusia gauzatzeko bidea" lankidetza dela konbentzitu behar dela, eta horretarako, Palestina errekonozitu beharra dagoela eta baita ere, oraindik egin ez duten herrialde arabiarrek, Estatu judua errekonozitu behar dutela.

Florian Hahn Alemaniako Atzerri ministrordea ere Madrilen izan da. Argi utzi du Alemaniarentzat funtsezkoa dela "Israelen existitzeko eskubidea", baina, era berean, esan du badakitela israeldarren segurtasuna palestinarren ere segurtasuna bermatzen denean lortuko dela eta azken horiek "etorkizunerako perspektibak" izan behar dituztela. "Horregatik, horretan lan egin nahi dugu, eta dagokiguna egingo dugu bi estaturen konponbidea praktikan jar daitekeela ziurtatzeko", zehaztu du Hahnek.

Gustura entzun ditu hitz horiek Mohammad Mustafa Palestinako lehen ministroak. Han izan dira Mohammed bin Abdulrahman Al Thani Qatarreko burua, baita Jordaniako eta Esloveniako lehen ministrordeak eta Saudi Arabia, Brasil, Norvegia, Portugal eta Islandiako Egiptoko Atzerri ministroak ere.

Jean-Noel Barrot Frantziako Atzerri ministroak bideokonferentzia bidez parte hartu du, eta Maltako, Turkiako, Erresuma Batuko, Alemaniako, Bahraingo eta Irlandako goi-kargudunek ere hartu dute parte. EBren izenean Luigi Di Maio Golkorako ordezkari berezia izan da bileran.