Israelgo Armadak erasoak areagotu ditu Gazan, "planari jarraituz"

Eyal Zamir Israelgo Estatu Nagusiko buruzagiak igande honetan Gazako Zerrendan dauden tropei egindako bisitan adierazi duenez, Armada Palestinako eremu horretan erasoak areagotzen ari da maiatzaren 17an hasitako erasoaldi berrian ezarritakoari jarraituz.

"Gure jarduera areagotzen ari gara, ezarritako planaren arabera. Hamas izugarrizko presiopean dago: aktibo gehienak eta agintea eta kontrola galdu ditu. Gure esku dauden tresna guztiak erabiliko ditugu bahituak etxera ekartzeko, eta Hamas eta haren erregimena desegiteko", esan du Zamirrek, ohar baten bidez.

"Helburuak lortutakoan amaituko da erasoaldia. Hamasen behin betiko porrota nahi dugu, eta erabakitasunez, zehaztasunez eta gure tropen segurtasuna bermatuz lortuko dugu", gaineratu du.

80 hildako asteburu honetan

Israeldarrek 80 pertsona inguru hil dituzte asteburuan Gazan, tartean gutxienez bi haur, erreskate langile bat eta kazetari bat.

Gainera, Gurutze Gorriaren Nazioarteko Batzordeak (ICRC, ingelesez) ohar batean salatu duenez, Israelek bere bi langile hil ditu larunbat honetan Khan Yunisen, haien etxeari eraso eginda. "Horien hilketak agerian uzten du Gazako heriotza zibilen kopuru onartezina. ICRCk su-etenerako eta zibilak, medikuak, sorospen humanitarioko langileak eta defentsa zibileko langileak barne, errespetatu eta babesteko premiazko deia egiten du", gaineratu du testuak.

Gosetea

Bitartean, Gazan, gosea da nagusi, azken orduetan ehun kamioi inguru baino ez baitira iritsi, agintari gazatarren arabera. Gainera, familiek, etsita, arpilatu beste aukerarik ez dute ikusten maiz.

Israelgo Defentsa Ministerioaren menpeko Lurraldeetako Gobernu Jardueren Koordinatzaileak (COGAT) igande arratsalde honetan jakitera eman duenez, igandean 107 kamioi sartu dira Gazako Zerrendan laguntza humanitarioarekin. Kamioi horietan irina eta elikagaiak zeuden.

Israelek maiatzaren 19an baimendu zuen laguntza humanitarioa Gazan sartzea, martxoaren 2an ezarritako blokeoari amaiera emanez. Ordutik 495 kamioi sartu dira zerrendan, laguntza eskasa, edonola ere, erakunde humanitarioek salatzen dutenez. 

Igande honetan sartutako kamioiak gora-behera, Gazako Gobernuaren arabera, Israelek "gosetea bultzatzen" jarraitzen du, ia hiru hilabeteko blokeoaren ondoren, oso mugatuta baitu elikagai eta laguntza humanitarioen sarrera eta banaketa. Murrizketa zorrotzak ditu ezarriak eta kamioiak ibilbide arriskutsuetatik joatera behartzen dituzte.

Ostiralean, Elikagaien Munduko Programak salatu zuen hamabost kamioi arpilatu zituztela Gazako hegoaldean.

Egun berean, agintari gazatarrek jakinarazi zuten kamioi baten eskoltako sei kide hil zituztela Deir al Balahn (erdigunea) Israelen eraso batean, tartean, boluntarioak eta Hamaseko Poliziako kideak.

Martxoaren 2an Israelek laguntza humanitarioa blokeatu zuenetik, 300 pertsona baino gehiago hil dira Gazan desnutrizioagatik, eta elikagai edo sendagai faltagatik.