Ia 180.000 desplazatu azken hamar egunetan Gazan, Israelgo armadaren erasoaldien ondorioz

Gazaren aurkako erasoek ez dute etenik. Ia 180.000 pertsonak etxea utzi eta alde egin behar izan dute Gazako Zerrendan azken 10 egunetan, maiatzaren 15etik 25erako tartean, Migraziorako Nazioarteko Erakundeak (IOM) astearte honetan zabaldutako azken balantzearen arabera. NBEren agentzia kezkatuta agertu da, gainera, gazatarrek babesleku gisa erabilitako guneen aurka Israelgo armada egiten ari den erasoak direla eta. Salatu duenez, gune horien aurkako erasoaldiak "ohikoak" bihurtu dira.

Gazako Zerrendan erasoaldia hasi zenetik 600 egun bete bezperan, Israelgo Armadak 54.000 palestinar baino gehiago hil ditu eta 123.000 zauritu baino gehiago eragin ditu dagoeneko, bertako agintariek astearte honetan salatu dutenez. Azken egunean 80 pertsona baino gehiago hil dituzte tropa israeldarrek.

Israelgo armadak gogortu egin ditu Gazako Zerrendaren aurkako erasoak azken astean. Joan den astearteaz geroztik, Israelek inguru horretako zenbait lekuren aurkako erasoak egingo zituela abisua eman ondotik, bertako biztanleei "beren segurtasunagatik" alde egiteko agindu die, eta gazatar ugari desplazatu dira. 

Bien bitartean, gosea da jaun eta jabe Gazan, eta azken egunetan, poliki bada ere, giza-laguntza iristen ari da, agintari gazatarren arabera. Israelek, bere aldetik, iragarri du gaur goizean Gazan laguntza humanitarioa duten 170 kamioi sartu direla, estatu sionistak eta AEBk babesten duten Gobernuz Kanpoko Erakunde pribatu baten laguntzarekin. Antza, gune berrietan ari dira janaria banatzen, baina ez dute kopuruari buruzko datu zehatzik eman. Nolanahi ere, janari-kaxak soinean dituztela hainbat gazatarren irudiak argitaratu dira agentzietan.

NBEren ustez, baina, erakunde pribatu hori egiten ari den banaketa "distrakzio bat" baino ez da, eta ez da Gazak behar duena.

Hamasek iragarri du protestak egingo dituela

Bien bitartean, eta erasoaldiak hasi zirenetik 600 egun beteko direnean, Hamasek mundu osoan protestak egiteko deia egin du ostiral, larunbat eta iganderako, "zibilen, haurren eta emakumeen aurkako genozidioa eta gosetearekin amaitu dezatela" eskatzeko. "Mundu mailako ekintza jarraitua eskatzen dugu holokaustoa berehala gelditzeko", esan du ohar bidez. 

Erresistentzia Islamikoaren Mugimenduak (Hamas), gainera, iragarri du onartu egin duela Gazako Zerrendan beste su-eten bat lortzeko AEBk aurkeztutako proposamena, eta adierazi du taldea Israelgo agintarien "erantzunaren zain" dagoela.