Israelek Gazako biztanle guztiak Rafahko hondakinetan biltzeko asmoa du; bi milioi pertsona baino gehiago

Israel Katz Israelgo Defentsa ministroak gaur iragarri duenez, Gazako Zerrendako hegoaldeko muturrean dagoen Rafah hiriaren hondakinetan "hiri humanitario bat" ezartzeko egitasmoa prestatzeko agindua eman dio Armadari.

Katzen arabera, "eremu humanitario berri horrek" Rafahtik gertu dagoen Mawasiko kostaldean nekez bizi diren 600.000 palestinar inguru hartuko lituzke, Armada sionistak Palestinako lurraldeko beste toki batzuetatik indarrez bota ondoren hilabete hauetan hara iritsitakoak.

Israelen helburua Gazako biztanle guztiak (bi milioi pertsona baino gehiago) bertan pilatzea da. Hala ere, Defentsa ministroak palestinarrak beste herrialde batzuetara "borondatez alde egitera" animatu ditu berriro, Donald Trump AEBko presidenteak urte hasieran proposatu zuen bezala.

"Hiri humanitario berri" horretara sartzen diren palestinarrek, Israelek "Hamaseko kideak" diren egiaztatuko duen segurtasun kontrolaren ostean, ezin izango dute bertatik atera, Katzek ohartarazi duenez.

Katzek zehaztu du Armada "hiri humanitario" hori zaintzeaz soilik arduratuko litzatekeela, eta laguntza banatzeko guneak jarriko lituzketela bertan. Hala ere, nazioarteko erakundek kudeatuko lukete, baina ez du xehetasun gehiagorik eman.

Horrek guztiak pentsarazten du Gazarako Fundazio Humanitario (GHF) polemikoak, Ameriketako Estatu Batuek eta Israelek babestutakoak, izango duela kudeaketaren ardura.

Hain zuzen ere, Israelek bost palestinar hil ditu gaur Rafahn, gutxienez, laguntza humanitarioa banatzeko gune batean zain zeudela, Wafa albiste-agentziak jakitera eman duenez.

Maiatzaren amaieran Israelek Gazan laguntza banatzeko eredua aldatu zuenetik (ordura arte NBEko agentziak arduratu ziren horretaz, batik bat), etengabe daude kaosa eta istiluak GHFk kudeatzen dituen eremuetan.

Guztira, GHFk lau banaketa zentro baino ez ditu jarri, oraingoz: bat Zerrendako erdialdean eta hiru hegoaldean.

Gazako Osasun Ministerioaren arabera, 750 pertsona baino gehiago hil dituzte laguntza guneetatik hurbil eta eremura sartzen diren NBEren elikagai kamioi apurren zain zeuden inguruetan, eta 5.000 pertsona baino gehiago zauritu dituzte.

Nahiz eta ez jakin zenbat pertsona hil diren Israelen tiroen ondorioz, banaketa gune horiek zaindu dituzten soldadu batzuek Haaretz egunkari israeldarrari aitortu zioten komandanteen aginduak jaso zituztela palestinarren aurka tiro egiteko, bistako arrazoirik edo argudio objektinorik gabe.

Gurutze Gorriaren Nazioarteko Batzordeak (GGNB) gaur ohar bidez esan duenez, Rafahko bere kanpaina-ospitaleak, Zerrendako hegoaldeko puntu horretan erabat erabilgarri dagoen bakarrak, 2.200 palestinar baino gehiago artatu ditu maiatzaren bukaeraz geroztik.

Bestalde, astelehen honetan, Armada sionistak 30 pertsona baino gehiago hil ditu Zerrendako iparraldearen aurka egindako erasoetan.