Ozeano Barea normal antzean, apaldu egin baita tsunamia izateko arrisku maila

Errusiako Kamtxatka penintsulan inoiz izandako lurrikararik gogorrenetako baten ondorioz (Richter eskalan 8,8 gradukoa) Ozeano Barean sortutako tsunami arriskuaren ondoren, kaltetutako hainbat herrialde —hala nola Japonia eta AEB— lasaiago dabiltza, eta Erdialdeko Amerikan eta Hego Amerikan erne jarraitzen dute, nahiz eta kasu batzuetan alarmak piztu diren.

Lurrikarak lau olatu handi eragin zituen, eta Paramuxir iparraldeko Kuril uharteetako kostaldea urez bete zuten. Hala ere, ebakuazio-planei esker —2.700 langun inguru mugiarazi zituzten— ez da biktimarik izan. Geroago, Errusiako penintsulak bigarren lurrikara bat jasan zuen, Richter eskalan 6,2 gradukoa, 21:56an (09:56 GMT), eta epizentroa 69 kilometroko sakoneran kokatu zen, Kamtxatkako hiriburutik ia 200 kilometrora, ekialdean.

Ordu gutxiren buruan, Errusiak tsunami alerta bertan behera utzi du, Sergei Lebedev Kamtxatka eskualdeko Larrialdi ministroak jakinarazi duenez.

Bestalde, Japonia, lurrikarak gehien astindu duen herrialdeetako bat, lasai antzean dago, hainbat orduz kaosa izan ondoren. Japoniako agintariek bertan behera utzi dute tsunami arriskuagatiko alerta Ozeano Bareko itsasertz luze-zabalean, baina kontuz ibiltzeko gomendatzen jarraitzen dute. Japoniako kostaldean hainbat altueratako olatuak izan dira, eta 1,3 metrora iritsi dira Iwaten (ipar-ekialdean). 

Era berean, Kristi Noem AEBko Segurtasun Nazionaleko idazkariak esan du tsunami gogorra etortzeko mehatxua "erabat igaro" dela, baina alerta prebentibo batzuk daudela mendebaldeko kostaldean. "Apaldu egin dugu Hawaiirako eta Alaskako eskualde batzuetarako ezarri zen tsunami arrisku-maila. Mendebaldeko kostalderako alerta dugu oraindik indarrean, baina kalte txikia eragiteko moduko inpaktua aurreikusten dugu", ziurtatu du.

Tsunamia Kaliforniako kostaldera iritsi zen eta Arena Cove, Monterrey eta Crescent Cityko mareografoetan erregistratu zuten. 

Mexikok ere bertan behera utzi du astearte gauean igorritako tsunami-alerta, herrialdearen itsasertzeko itsas mailaren ebaluazioa eta lurrikararen epizentroan gertatutakoaren jarraipena egin ostean.

Erdialdeko Amerikan, aldiz, "30 zentimetro eta metro bat arteko altuera izan dezaketen olatuak kotaldera iristeko alerta" dago, Panamako Unibertsitateko Geozientzien Institutuaren arabera.

Txilen, Hondamendiei Aurre Egiteko eta Erantzuteko Zerbitzuak (Senapred) alerta gorria ezarri zuen, eta kostaldeko herri guztiak ebakuatu zituen, Arica eta Parinacota eskualdeetatik Magallaneseraino.

Costa Rican alerta horia ezarri zuen eta uretako jarduerak bertan behera geratu ziren eguneko lehen orduetan, "ezohiko korronteak" aurreikusten zirelako.

Antzeko egoera agertu da Kolonbian ere, gobernuak bertan behera utzi baitu asteartean zabaldutako tsunami alerta.