Israelen eta Iranen arteko erasoaldi betean, Trumpek uste du ez direla su-etenerako baldintzak betetzen

AEBko presidente Donald Trumpek adierazi du ez duela Irango agintariekin balizko akordio batera iristeko aukerarik ikusten, ez direlako horretarako "baldintza egokiak" ematen, nahiz eta argi duen Teheran su-etena negoziatzeko prest dagoela.

"Iranek akordio bat erdietsi nahi du, baina nik ez, ez direlako horretarako baldintzak betetzen", azaldu du agintari estatubatuarrak NBC telebista kateari emandako elkarrizketan. Bertan zehaztu du itun baterako baldintzak "oso irmoak" izan behar direla.

Dena den, ez du horren inguruko ñabardura gehiagorik eman, baina "Iranek edozein anbizio nuklear baztertu beharko luke", erantsi du.

AEBk Iranen aurka egin dituen erasoen bilakaerari dagokionez, Trumpek azpimarratu du agerian geratu dela indar estatubatuarren nagusitasuna. "Iranen gaitasuna irismen txikiko misil bat jaurtitzera mugatzen da. Hori da Irango indar armatuek duten botere bakarra, eta eraso horiek erraz geldiarazi ditzakegu", esan du.

Erasoek ez dute etenik

Israelek iragarri du beste bonbardaketa olde bat hasi duela igande honetan Iranen aurka, oraingoan herrialdearen mendebaldeko jomugen kontra.

400 bonbardaketa baino gehiago egin ditu Iranen, otsailaren 28an AEBrekin batera operazio militarra hasi zuenetik.

Armadaren datuen arabera, larunbatean bakarrik, Israelgo gerra-hegazkinek 200 helburu baino gehiago jo dituzte persiar herrialdean, dozenaka misil jaurtigailu, aireko defentsa-sistemak eta arma-biltegiak barne.

Gainera, 800 pertsona inguru hil ditu Libanon, azken erregistro ofizialaren arabera, eta 1.933 zauritu baino gehiago eta ia milioi bat desplazatu utzi ditu bertan.

Israelen, Iranen misilek 12 hildako eragin dituzte orain arte.

Iranek Netayahuren burua eskatu du

Bestalde, Benjamin Netanyahu Israelgo lehen ministroa "etenik gabe" jazarriko duela adierazi du Irango Guardia Iraultzaileak igande honetan.

Guardia Iraultzaileak iragarri duenez, Iranek 52 eraso egin ditu Israelgo sektore industrialen eta Ekialde Hurbileko beste herrialde batzuetan AEBk dituen indarren aurka, baina ez du zehaztu non.

Bien bitartean, Donald Trumpek esan du AEBk berriro bonbardatu dezakeela Irango Kharg uhartea, Islamiar Errepublikaren petrolio industriaren erdigunea, ostiralean Ekialde Hurbileko "historiako bonbardaketarik indartsuenetako bat" egin ostean.

NBC kateari telefonoz egindako elkarrizketa batean adierazi zuenez, "agian" berriro bonbardatuko dute, "dibertitzeko baino ez bada ere".

Gainera, bart, agintari estatubatuarrek ostegunean Iraken hil ziren sei soldadu estatubatuarren izen-abizenak plazaratu dituzte. Pentagonoak esan du istripu batean hil zirela; Iranen eta irakiar milizien arabera, baina, misil batek jo zituen.

Sei hildakoak honako hauek dira: John A. Klinner (33 urte, Auburn, Alabama), Ariana G. Savino kapitaina (31 urte, Covington, Washington), Ashley B. Pruitt sarjentu teknikoa (34 urte, Bardstowna, Kentucky), Seth R. Koval kapitaina (38 urte, Mooresville, Indiana), Curtis J. Angst kapitaina (30 urte, Wilmington, Ohio), eta Tyler H. Simmons sarjentu teknikoa (28 urte, Columbus, Ohio).

Horiek ere zenbatuta, 14 dira jada otsailaren 28an Iranen aurkako erasoaldia hasi zenetik hil diren soldadu estatubatuarrak: horietako zazpi irandarren erasoen ondorioz hil ziren; bat, Kuwaiten izandako "larrialdi mediko" baten ondorioz; eta gainerakoak, Irakeko gertakarian.