“Barne arazoetan esku sartzea” gaitzesteko adierazpen bateratua egin du Shanghaiko Lankidetza Erakundeak Txinan

Shangaiko Lankidetza Erakundeak ez du onartu inoren "barne arazoetan esku sartzea", eta gaitzetsi egin ditu ere "nazioarteko merkataritzari eragindako astinaldiak". Hala azaldu da erakundea Xi Jinping txinatarraren, Vladimir Putin errusiarraren eta Narendra Modi indiarraren arteko bileraren ostean.

Txinako Tianjin hirian herrialde kideetako buruzagiek sinatutako eta Txinako hedabideetan argitaratutako adierazpen batek "barne arazoetan esku-sartzerik ez" egitearen garrantzia azpimarratzen du, eta kritikatu egiten ditu "giza eskubideak babesteko aitzakiarekin" egindakoak, eremu horretan "sestra bikoitzak" daudelakoan.

"Estatu kideek bake iraunkorreko mundua eraikitzearen alde egiten dute, eta mehatxu eta erronkei erantzun koordinatua eman behar diegu", dio testuak. Ildo horretan, iragarri dute "separatismoaren, terrorismoaren eta estremismoaren aurkako borrokan" herrialde kideak elkarlanean arituko direla.

Gogoratu behar da blokeko Defentsa ministroek ekainean Txinako Qingdao hirian egindako bilera adierazpen komunik gabe amaitu zela, Pakistanen eta Indiaren artean terrorismoa dela eta izandako desadostasunen eta joan den apirilean Indiak administratutako Kaxmirren izandako erasoaren ondorioz (26 pertsona hil ziren). Gauzak horrela, Indiak herrialdearen aurkako eraso militarra hasi zuen.

Astelehen honetako oharrak "gogor" gaitzetsi du erasoa.

Lankidetzarako erakundeko kideek "elkarrekin lan egiten jarraituko dute ideologia erradikalen hedapena, intolerantzia erlijiosoa, xenofobia, nazionalismo bortitza eta arraza- eta etnia-diskriminazioa saihesteko", aldarrikatu dute.

"Borroka geopolitikoa" deitoratu dute

Adierazpenean jasotzen denez, "borroka geopolitikoa areagotzeak mehatxuak eta erronkak planteatzen ditu munduko eta erakundeko segurtasunerako eta egonkortasunerako".

Ildo horretan, adierazi dute "munduko ekonomiak, bereziki nazioarteko merkataritzak eta finantza-merkatuek, eraso larriak" jasan dituztela, Donald Trump AEBko presidenteak piztutako gerra komertzialari erreferentzia eginez.

Erakundearen parte diren herrialdeak "ordezkagarriagoa, demokratikoagoa eta bidezkoagoa den mundu multipolar bat eraikitzearen" alde daude, eta nabarmendu dute Nazio Batuen "zeregin nagusia koordinazioa" dela.

Testuak adierazten duenez, erakundea "nazioarteko eta eskualdeko gatazkak blokeen eta konfrontazioaren ikuspegiaren bidez konpontzearen aurka dago".

Adierazpenak ez dio inolako erreferentziarik egin Ukrainako gerrari.

Astelehen honetako bileran, Putinek India eta Txina gatazka horretan bakea lortzeko egindako ahaleginak eskertu ditu, eta "Mendebaldeak Ukraina NATOn sartzeko egindako saiakerak" aipatu ditu gatazkaren arrazoietako bat bezala.

Lankidetzarako erakundeak ez du elkar defendatzeko klausularik, NATOk ez bezala, eta bere kideen artean ditu Txina, Errusia, India, Pakistan, Iran, Bielorrusia, Kazakhstan, Kirgizistan, Tajikistan eta Uzbekistan, zeinak, oro har, munduko biztanleen % 40 inguru biltzen dituzten. Gainera, Egipto, Turkia, Birmania eta Azerbaijan herrialde "begirale" eta elkarrizketa-bazkideak dira.