Israelek Sumud Flotillako 443 kide atxilotu eta Beersebako espetxe batera eramango ditu ondorengo orduotan

Israelgo Gobernuak arratsaldean amaitutzat eman du Gazara bidean zihoan Global Sumud Flotilla atzemateko operazioa. Antza, flotillako ontzi bakarra geratzen da itsasoan, Summertime izenekoa eta lege-babesa ematera joana zena.  "Hamas-Sumud probokazio-ontzietako bakar batek ere ez du lortu legez ezarri dugun itsas-blokeoa gainditzea", idatzi du X sare-sozialean, Benjamin Netanyahuren Gobernuak. "Probokazio honetan parte hartu duen azken ontzi bat geratzen da itsasoan. Urruti dago, baina hurbiltzen bada, hari ere debekatu egingo zaio sarrera".

Horrenbestez, flotilla desenginda geratu da: 500 kideetatik, 443 preso hartu eta Asdodeko portura  eraman dituzte. Handik, Beersebako kartzela batera eramango dituzte guztiak ondorengo orduotan. 

Israelek ezarritako blokeoa hautsi eta Gazara laguntza humanitarioa eramatea zen flotillaren helburua. Atzo arratsaldean, iragarritako bete, eta Israelgo Armadak operazioa abiatu zuen, ontzi guztiak atzemateko. 12 ordu baino ez zituen behar izan, operazioa burutzeko. 

"Probokazioa amaitu da"

Ontzi bakar batek ere ez du lortu Israelgo Armadak Gazan ezarritako blokeoa gainditzea, eta, hortaz, amaitu da Gazara giza laguntza itsasoz eramateko ahalegina. "Probokazioa amaitu da", gaineratu du. 

Flotillako kide guztiak onik daudela azpimarratu du Israelgo Armadak sare sozialetan zabaldutako mezu batean, eta Israelera bidean daudela. Halaber, flotillako ontziak yate gisa izendatu ditu eta bidaiariak Hamasekin lotu ditu. 

Benjamin Netanyahu lehen ministroa buru duen Israelgo Gobernuaren esanetan, oraindik "borroka eremura" gerturatu ez den azken itsasontzi bat atzematea falta da. Azken hori gerturatuz gero, geldiarazi egingo dutela argi utzi du. 

Bien bitartean, Israel atxilotuak Ashdodeko portura eramaten hasi da, deportatu aurretik. 

Atxilotuen artean, gutxienez 40 espainiarrak dira, 35 italiarrak, 32 turkiarrak, 21 Malaysiakoak, 25 Tunisiakoak, 12 Brasilgoak, 31 Frantziakoak, 20 estatubatuarrak. Horiez gain, Erresuma Batuko, Alemaniako, Mexikoko eta Kolonbiako herritarrak ere badaude. 

Itsasontziak nazioarteko uretan atzeman dituzte, Gazako kostaldetik 80 bat itsas miliara, eta ekimenaren bultzatzaileen arabera ekintza honek nazioarteko zuzenbidea urratzen du. Atxilotutako ontzien artean Alma, Adara, Sirius, Aurora, Dir Yassine eta Grande Blu daude, besteak beste.

Maria Elena Delia Italiako Atzerri Ministerioaren bozeramaileak azaldu duenez, "flotillako kideek bi aukera izango dituzte. Lehenengoa da onartzea berehala kanporatzea, borondatez. Bigarrena aurrekoari uko egitea da, eta espetxean atxilotzea onartzea, nahitaezko aberriratzearen zain".

Ez badute kanporatzea onartzen, "Flotillako kideek agintari judizialen erabakiaren zain egon beharko dute; normalean, 48 eta 72 ordu artean luzatzen da tarte hori".

Gustavo Petro Kolonbiako presidenteak Israelen dauden diplomazialari guztiak erretiratzeko agindua eman du, eta iragarri du hautsi egin duela Tel Avivekin duen merkataritza libreko ituna, Kolonbiako bi herritar "bahitu" dituztela salatuz. Txile, Bolivia, Venezuela, Malaysia eta Turkiako gobernuek ere Israelen jokabidea gaitzetsi dute, eta Espainiak eta Frantziak euren herritarren segurtasuna bermatzeko eskatu dute.

Erroman milaka pertsona kalera atera dira eta Italiako sindikatuek greba orokorra deitu dute ostiralerako. Grezian, Suitzan, Espainian, Turkian, Argentinan, Mexikon, Alemanian eta Kolonbian ere protestak izan dira.

Euskadin, unibertsitateko ikasleek elkarretaratzeak deitu dituzte ostegun honetarako EHUko hainbat campusetan, Israelen blokeoa amaitzea eskatzeko eta ontzidiari babesa adierazteko.

Palestinarekin Elkartasuna plataformak ere Gazarako Mugimendu Globalak Hego Euskal Herriko hiriburuetan deitutako mobilizazioetan parte hartzeko deia egin du, Sumud ontzidiaren aurkako "erasoa" salatzeko eta mobilizazioak deitu ditu dozenak udaletxeren aurrean ostegun arratsaldearako. 

Hamasen erantzuna

Erresistentzia Islamikoaren Mugimenduak (Hamas) gaitzetsi egin du Israelgo Armadak izan duen jarrera, eta "pirateria" dela adierazi du.

"Israelgo Armadak nazioarteko uretan Flotillaren ontziak geldiaraztea eta horietan dauden ekintzaileak eta kazetariak atxilotzea traiziozko erasoa da, zibilen aurkako pirateria eta itsas terrorismo delitua", dio taldeari lotutako Filastin egunkariak jasotako ohar batek.

Hamasek gogorarazi du ekintza horiek "okupazioaren krimenen historia beltzari" gehitu behar zaizkiola, eta ziurtatu du  "bi urtez genozidioa eta gosete sistematikoa jasan duen" Gazan "setiatutako" herri palestinarrari larrialdiko laguntza emateko "premiazko" misio humanitarioa egiten ari ziren nazioarteko "ekintzaileen aurkako eraso basatia" dela.

"Gogor gaitzesten dugu etsaien Armadak ontzidiaren aurka egindako eraso basati hau, eta Israelek egindakoa munduko pertsona aske guztiek gaitzetsi beharreko ekintza kriminala dela baieztatzen dugu", adierazi du. Aktibisten "ausardia" eta herri palestinarraren aurkako "setioa hausteko ausardia" txalotu ditu Hamasek.