Hasi da boto zenbaketa Txileko hauteskunde presidentzialetan

Txilen 18:00ak zirenean (21:00 GMT) itxi dituzte hauteskunde presidentzialetako hauteslekuetako ateak. Jeannette Jara progresismoaren hautagaia faborito da, baina, inkesten arabera, ez du bigarren itzulia saihesteko nahikoa babes izango. Hemendik ordu gutxira, boto-zenbaketa amaitzen denean, baieztatu edo ezeztatuko da inkestek diotena.

Oraingoz, parte-hartzea izan da eguneko protagonista Txilen. Historian lehen aldiz, derrigorrezkoa izan da botoa ematera joatea eta ilara luzeak ikusi dira kaleetan eta hauteslekuetan.

Bildutako jendetza dela eta, litekeena da zenbaketaren hasiera atzeratzea bozketa-zentro batzuetan.

Hautagaiak

Txiletarrek Gabriel Boric progresistaren ondorengoa aukeratu behar zuten.

eannette Jara ministro ohi komunista da faboritoa eta lehia estua dago eskuin muturreko hautagaien artean bigarren posturako.

Jara, 51 urteko abokatu eta administratzailea, nagusi da inkestetan, baina lehen itzulian Presidentetza eskuratzeko behar den gehiengotik urrun. Hori dela eta, aurreikuspenak baieztatuz gero, bigarren itzulia egin beharko dute abenduaren 14an.

Lan ministro ohiak progresisten hautagai bakarra izatea lortu zuen hauteskunde primarioetan, eta sektore hori presidentetzarako hauteskundeetan ordezkatzen duen lehenengo militante komunista da. Boto-emaile askok boterera iristeko oztopo gisa ikusten dute jatorri komunista hori.

Hala ere, Jarak esan du irabaziz gero militantzia horri uko egingo diola batasun irudia emateko eta horren atzean inoizko koalizio zabalena dagoela erakusteko; izan ere, besteak beste, demokristauak eta Alderdi Komunista batu dira oraingo honetan koalizioan aurkezteko.

Eskuindarrek, aldiz, hauteskundeetara bakoitza bere aldetik aurkeztea erabaki zuten; beraz, hauteskunde hauek, nolabait, sektore horren primarioak bezala hartu dituzte.

Duela aste batzuk argi zirudien Jose Antonio Kast (59 urte) bigarren itzulira igaroko zela, baina debekualdiaren aurretik argitaratutako inkesta askoren arabera, buruzagi ultraeskuindarra babesak galtzen ari da eta arriskuan egon daiteke agintera iristeko hirugarren saiakera.

Horren errua Johannes Kaiser diputatuak du, ultraeskuin erradikalago baten ordezkariak. Inkesta batzuen arabera, Kastekin berdinduta dago, % 20ko babesa lortuko baitu bakoitzak.

Biek iragarri dutenez, irabaziz gero, mugak itxiko dituzte, migrazio irregularrari eta delinkuentziari aurre egingo diete, zergak jaitsiko dituzte eta Estatuaren tamaina murriztuko dute.

Ondoren, Evelyn Matthei alkate ohia dago, eskuin tradizionalekoa, hilabete askotan faboritoa izan dena, baina inkestetan % 14raino jaitsi dena.

Eskuineko hiru hautagaiak bigarren itzulian elkartzen badira, eta hori egingo dute, adituen ustez, Jarak aukera gutxi izango ditu agintea eskuratzeko.