Gutxienez 40 hildako eta 115 zauritu, gehienak larri, Suitzako Crans Montana eski-estazioan izandako sute batean

Suitzako agintariek baieztatu dutenez, gutxienez 40 pertsona hil eta 115 zauritu dira, oso larri, bart Suitzako Crans Montana eski estazioko taberna batean izandako leherketa eta ondorengo suteen ondorioz, eta urte berriari harrera egiteko festa behar zuena tragedia bilakatu da. 

"Dozenaka pertsona hil dira", baieztatu du ostegun goizean Frederic Gisler Valaisko Polizia Kantonaleko komandanteak prentsaurreko batean

Oraingoz ez dago hildakoen nortasunari buruzko datu ofizialik. Gislerek berak adierazi duenez, "lehentasuna" oraindik identifikatu ez dituzten hildakoak identifikatzea izango da,.

"Hildakoen identifikazioari emango zaio lehentasuna, gorpuak berehala familiei bueltatu ahal izateko", azaldu du komandante frantziarrak.

Era berean, Matthias Reynard kantonamenduko presidenteak deitoratu du identifikazio prozesuak ohi baino denbora gehiago behako duela, "zauri larri eta erredura larriek" eragindako "egoera kritikoaren" aurrean.

Hala eta guztiz ere, hildakoen artean atzerritarrak badaudela baieztatu dute agintariek; horien artean, bi frantziar.

Zaurituak hainbat erietxetara bideratu dituzte, larrien dauden Siongo Ospitalera, Valaisko hiriburura; han, ebakuntza-gelak eta zainketa intentsiboko unitateak goraino daude, Mathias Reynard kantonamenduko Osasun arloko arduradunak azaldu duenez. 

Gainera, harrera puntu bat ezarri dute biktimen senitartekoei eta ezbeharraren lekukoei laguntza psikologikoa eskaintzeko.

EFEk tokian bertan elkarrizketatutako bizilagunen arabera, "Le Constellation" taberna lurpe moduko batean kokatuta dago eta eskilara batzuetatik sartzen da bertara; horrek zaildu egin izan dezake sutearen unean barruan zeudenak bizkor atera ahal izatea. 

Bart hamar helikoptero, 40 anbulantzia eta 150 langile inguru mobilizatu dira, suhiltzaileak, erreskate-ekipoak eta bestelako larrialdi-langileak tartean.  

Atentatuaren hipotesia baztertuta

Orain arte bildutako zantzuen arabera, agintariek erabat baztertu dute atentatuaren hipotesia, 01:30 inguruan entzun zen eztanda suteak berak eragindakoa izan zela ondoriozatztu baita. "Ez da, inolaz ere, atentatu bat izan", esan du Beatice Pillaud Valaisko kantonamenduko fiskal nagusiak. 

Informazio zehatzagoaren faltan, agintariek ez dute sutearen arrazoien inguruko espekulaziorik egin nahi, eta lokalak segurtasun neurriak betetzen ote zituen galdetuta, ez dute erantzun nahi izan. 

Testigantzak

Reuters agentziak jasotako informazioen arabera, sua piztu zenean tabernan zeudela ziurtatu duten bi emakume frantziarrek BFM TV telebista kate frantziarrari adierazi diote nola piztu zen sutea klubeko sotoan. Haien arabera, tragediaren jatorria bengalak edo artifizio piroteknikoak izan ziren, xanpain botila batzuetan jarriak zeudenak. Horien hitzetan, bengalaren bat egurrezko sabaira hurbildu zenean piztu zen sua. 

"Sua derrepentean zabaldu zen sabai osoan zehar", adierazi dio BFM TVri bi emakumeetako batek. Biek adierazi dute eskailera estu batetik igo zirela goizko solairura eta eraikinetik ihes egitea lortu zutela, kaosaren eta izuaren erdian. Minutu batzuk geroago, suak goiko solairu hori ere hartua zuen, azaldu dutenez.

Lekukotza hauek ez dira beste iturri batzuekin kontrastatu baina Reutersek egiaztatutako bideo batzuetan ikusten da sua nola ateratzen den eraikinetik, kanpoan jendea korrika eta oihuka ikusten dela.