Iran aztertzen ari da bere 14 puntuko bake planari AEBk emandako erantzuna

Gerrari amaiera emate aldera Trumpi proposatutako 14 puntuko bake planaren harira, Iranek baieztatu du jaso duela dagoeneko AEBren erantzuna. Pakistanen bitartez jaso omen du erantzuna, eta ziurtatu du sakon aztertu eta lehenbailehen hitz egingo duela horri buruz.

"Pakistanen bitartez iritsi zaigu Teheranek egindako proposamenari buruz AEBk duen iritziaren berri", adierazi dio Atzerri Ministerioko bozeramaile Ismail Bagaeik Estatuko telebista kateari.

Haren hitzetan, oraingoz aztertzen ari dira AEBren jarrera, eta behin azterketa amaituta, erantzun bat emango diote.

Iranek igorritako bake plana

Tasnim Irango agentziaren arabera, Iranek 9 puntuko proposamen bat helarazi dio AEBri, Pakistango bitartekari baten bitartez, "gerrari bukaera emate aldera".

AEBk bi hilabeteko su etena eskatu zuen bere proposamenean, baina Iranek erantzun dio konpontzeko dituzten gaiei 30 eguneko epean eman behar dietela irtenbidea, eta menia luzatu beharrean, "gerra amaitzea" izan behar dutela helburu.

Horrela, hauxe jaso du Iranek 14 ataletan banatutako proposamenean: eraso militarrik egongo ez dela bermatzea, AEBren tropak Irandik ateratzea, itsas blokeoa altxatzea, izoztutako Iranen aktiboak libratzea, konpentsazioak ordaintzea, zigorrak kentzea eta gerra fronte guztietan bukatzea (Libanon ere bai), baita Ormuzko itsasarterako mekanismo berri bat sortzea ere.

Oraingoz, baina, AEBren erantzunaren zain dago Iran.

"Ezinezkoa den operazio militar bat edo akordio txar bat" aukeratu beharko du Trumpek, Iranen hitzetan

Bestalde, Irango Guardia Iraultzaileak esan du AEBrekin dituen negoziazioetan irabazteko aukera guztiak dituela. Horien aburuz, Donald Trumpek ia ez du aurrera egiteko aukerarik, Iranek Ormuzko itsasartean ezarritako blokeoak eta AEBren itxierak mundu osoan izandako eragin ekonomikoa dela eta.

Sare sozialetan argitaratutako ohar labur batean, Guardia Iraultzaileak zehaztu du Trumpek esku artean duela Iranek egindako azken ultimatuma, blokeoa kentzeko zehaztu gabeko data duena. Gaineratu duenez, Teheranen aliatuek, Errusiak eta Txinak esaterako, eta baita Europak ere, gero eta ozenago eskatzen dute krisiari behin betiko amaiera ematea.

Guardia Iraultzailearen arabera, "modu bakarra dago gertakari horiek interpretatzeko": Trump "ezinezko operazio militar baten edo Errepublika Islamikoarekin akordio txar baten artean" harrapatuta dago.

Trumpek esan du AEBk "5.000 militar baino askoz gehiago" erretiratuko dituela Alemaniatik

Bestalde, AEBko presidenteak adierazi duenez, Alemaniatik "5.000 soldadu estatubatuar baino gehiago" erretiratzeko asmoa du. Iranen aurkako gerran izan duen babes faltagatik aliatu europarrekin duen ika-mikaren erdian iritsi da erabakia.

"Izugarri murriztuko dugu, eta 5.000 baino gehiago murriztuko dugu", esan du Trumpek Floridan.

Pentagonoko goi funtzionarioek atzo adierazi zuten Pete Hegseth Gerra idazkariak "Alemaniatik 5.000 soldadu inguru" erretiratzeko agindu duela.

Erabaki hori "operazioen beharrek eta baldintzek" eragin dutela esan zuten, baina Trumpen administrazioaren eta Europako aliatuen arteko tentsioen erdian iritsi da, Irango gatazkan lagundu ez izana leporatzen baitie.

Pentagonoko iturrien arabera, "erretiratzea datozen 6-12 hilabeteetan osatuko da".

AEBk guztira 68.000 soldadu ditu Europako 12 herrialdetan sakabanatuta. Horietako 36.000 Alemanian daude, eta 12.000, Italian. Espainian, berriz, 3.800 soldadu ditu.