Abisu horia gaur arratsalderako Euskal Herrian, euriagatik

Eusko Jaurlaritzaren Segurtasun Sailak Araban, Bizkaian eta Gipuzkoan, Aemetek Nafarroan (Pirinioetan salbu) eta Meteofrancek Iparraldean, abisu horia ezarriko dute arratsaldean euriteak espero baitira: ordubetean metro koadroko 15 litro bota ditzake.

Abisu horia 15:00etan aktibatuko da Araban, Bizkaian eta Gipuzkoan (21:00ak arte), 12:00etan Nafarroan (22:00ak arte) eta 16:00etan Iparraldean (00:00ak arte). 

Giro eguzkitsua nagusitu da goizean. Arratsaldean, berriz, hegoaldetik iparraldera mugituko den ezegonkortasun lerro batek zaparradak eragingo ditu eta ekaitzak ere jo dezake; ekaitzekin batera haize bolada zakarrak eta tamaina txikiko txingorra izan daitezke. Hala ere, zaparradek ez dute luze joko, eta ostarte zabalak irekiko dira berriro arratsalde-gau partean.

Asteburuan, goizetan eguzkia eta arratsaldetan euria

Eguraldiak atseden txiki bat emango du asteburuko goizetan, baina ezegonkortasuna eta euria egiteko arriskua izango dira arratsaldeetan Euskal Herriko hainbat tokitan. Tenperaturek gora egiten jarraituko dute hego haizeari esker, eta udaberriko giroa nagusituko da asteburuan, Euskalmeten arabera. Datorren astearen hasiera, ordea, euritsuagoa izango da.

Larunbatean, hego-ekialdeko haizearekin jarraituko dugu. Mendialdeetan nabarituko da gehien, eta tenperatura maximoak 18 eta 24 gradu artekoak izango dira, Euskalmeten arabera. Zeruan aurreko egunetan baino hodei gehiago agertuko dira goizean; oro har, erdi mailako hodeiak eta goi-hodeiak izango dira nagusi, eta baliteke euri zaparrada txikiren bat egitea, batez ere barnealdean. Arratsaldean, berriz, hodei geruza trinkoagoa izango da, eta ez da baztertzen zaparrada bakan batzuk egitea, batez ere Nafarroan. Behe lainoa sor liteke goizaldean Ebro ibarrean.

Bilbon eta Donostian, tenperatura maximoak 22-23 gradura iritsiko dira, eta minimoak 13-14 graduraino jaitsiko dira. Gasteizen eta Iruñean, berriz, maximoak 20 gradu ingurukoak izango dira, eta minimoak 8-10 graduraino jaitsiko dira. Baionan, azkenik, maximoak 24 gradura iritsiko dira, eta minimoak 14 graduraino jaitsiko dira.

Igandea ere ezegonkorra izango da, batez ere arratsaldean. Giro lasaia eta eguzkitsua izango da goizean, Euskalmeten iragarpenaren arabera. Arratsaldean, ordea, bero hodeiak garatuko dira, eta baliteke zaparradak izatea lurraldeko hainbat tokitan; ekaitzak ere jo dezake. Hego-mendebaldeko haize bizia ibiliko da, eta brisa nagusituko da kostaldean arratsaldean. Ez da tenperatura aldaketa handirik espero.

Astelehena

Astelehenean, azkenik, zerua hodeitsu egongo da. Zaparrada txikiak izango dira (zenbait tokitan ertainak izan daitezke), batez ere egunaren bigarren partean eta isurialde atlantikoan. Hego-osagaiko haize ahul-bizia ibiliko da, bolada gogorrekin tarteka. Tenperaturek ez dute aldaketa handirik izango edo apur bat jaitsiko dira.