Frankofoniaren eremuan hizkuntza gutxituek dituzten erronkei buruzko biltzarra antolatu du Etxepare Institutuak Parisen

Etxepare Euskal Institutuak 'Langues minorisées en contexte francophone: traduire, transmettre, transformer' (Hizkuntza gutxituak testuinguru frankofonoan: itzuli, transmititu, eraldatu) nazioarteko biltzarra antolatu du azaroaren 19rako erta 20rako Parisko Sorbonne eta Sorbonne Nouvelle unibertsitateetan, frankofoniaren unibertsoan hizkuntza gutxituek dituzten erronken inguruan hausnartzeko.

Astelehen honetan egindako aurkezpenean azaldu dutenez, topaketak bat egiten du Etxepare Euskal Institutuaren 15. urteurrenarekin, eta 'Ça colle au basque' ekimenaren testuinguruan antolatu da, unibertso frankofonoan euskararen eta euskal sorkuntzaren proiekzioa indartzeko abiatutako egitasmoaren baitan, alegia.

Biltzarrean bederatzi unibertsitatetako 20 hizlarik hartuko dute parte, testuinguru frankofonoan hizkuntza gutxituek gaur egun dituzten erronken inguruan hausnartzeko. Hala, "egoera diglosikoan dauden hizkuntzen funtzio soziala eta hizkuntza aniztasuna" ikusarazi eta aldarrikatuko dira.

Euskara abiapuntu eta inspirazio iturri hartuta, "eremu frankofonoko hizkuntza gutxituen arteko elkarrizketa" abiatuko da biltzarrean. Hiru mahai ingururen eta bi hitzaldi nagusiren bidez, hizkuntza horien itzulpen, transmisio eta aintzatespen dinamikei buruz jardungo dute, baita haien eskubideen aitortzari buruz ere.

Besteak beste, hizkuntzalaritza, itzulpengintza, literatura konparatua, zientzia politikoa, soziologia, antropologia eta kultura-ikasketen esparruko nazioarteko irakasle eta adituek hartuko dute parte biltzarrean.

Euskara eta unibertso frankofonoko beste hizkuntza gutxitu batzuk -hala nola Guyana Frantseseko hizkuntza indigenak, Antilletako kreolera edo bretoiera-, "hizkuntza gutxituen inguruko eztabaidaren" erdigunean jarriko duen lehen mailako topaketa akademikoa izango da."

"Balio sinboliko handia"

Irene Larraza Etxepare Euskal Institutuko zuzendari nagusiak aurkezpenean adierazi duenez, "kongresu hau Parisko bihotz akademikoan egiteak balio sinboliko handia du: hizkuntzen eremuan euskarari bere lekua aitortzea eta hizkuntza-aniztasuna Europako balio gisa onartzea esan nahi du".

"Normalean periferian kokatzen diren hizkuntzak elkartuz, topaketak erdigunearen eta bazterren arteko harremana irauliko du zenbait egunez, hizkuntza gutxituen eginkizun soziala eta indar bizia lehen lerrora ekarriz", azaldu du.

Horrela, hizkuntza aniztasunaren inguruko hausnarketa eta truke intelektualerako espazio berritzailea zabaltzeaz gain, biltzarrak sendotu egingo du Etxepare Euskal Institutuaren aliantza nazioarteko bi erreferente akademikorekin (Université Sorbonne Nouvelle eta Sorbonne Université).

15 urteko ibilbidea

Aurten 15 urte bete dira Etxepare Euskal Institutuak bere jarduera abiatu zuenetik, eta urteurrena ospatzeko antolatutako ekitaldien artean dago Parisko biltzarra.

Ospakizun ekitaldi nagusia azaroaren 19an egingo da, Frantziako Liburutegi Nazionalean, Imanol Pradales Eusko Jaurlaritzako lehendakaria buru dela. Politikaren, erakundeen eta kulturaren esparruko ordezkari ugari eta Parisen bizi diren euskal diasporako kideak ere izango dira bertan.

Ekitaldia balio sinbolikoa duen espazio batean egingo da, Frantziako Liburutegi Nazionalean gordetzen baita euskaraz argitaratutako lehen liburuaren ale bakarra (Bernat Etxepareren 'Linguae Vasconum Primitiae').