Bermeo buru-belarri murgildu da Nestor Basterretxea artistaren mendeurrenaren ospakizunetan

XX. mendeko euskal artista nabarmenetakoa eta eragin handienekoa izan zen Nestor Basterretxearen jaiotzaren mendeurrenaren ospakizunek hartu dute Bermeo larunbat honetan, Barrueta Arte Elkarteko kideek antolatutako 'Nestor Basterretxea 100 urte' erakusketaren inaugurazioarekin.

Gorka Basterretxeak, eskultore eta margolariaren bost seme-alabetako batek, gogoratu duenez, bere aita "bermeotarra sentitzen zen eta bere herriarekin izan duen harremana oso estua izan da beti".

Bere jaioterrian, azpimarratu duenez, "lagun asko" zituen eta askotan etortzen zen herrira. "Bermeon asko maite zutela ikusten da, eta hori erakusteko oso modu polita da hau", ziurtatu du, erakusketaren irekiera ekitaldian. 

Nestor Basterretxea Bermeon jaio zen 1924ko maiatzaren 6an, eta Gerra Zibila hasi zenean Frantziara erbesteratu zen. Nerabezaroan ezagutu zuen bere bokazio artistikoa eta marrazten hasi zen. Urtebetetik gora iraun zuen itsasontziz egindako exodo baten ondoren, bere familia Buenos Airesen kokatu zen 1942an.

Huerko Institutuan ikasketa teknikoak egin zituen eta Emilio Pettoruttirekin pintura klaseak hartu zituen. Publizitatean lan egin zuen, eta arlo horretan lortu zituen lehen pintura-sariak. Maria Isabel Irurtzunekin ezkondu zen eta, ezkontza-bidaia aprobetxatuz, Espainiara itzuli zen 1952an, eta 1958an Euskal Herrira itzuli zen. Hondarribian hil zen 2014ko uztailaren 12an.

Nestor Barrenetxea, Bizkaiko herriko "seme kuttunaren" mendeurrenean bere obra osoa gogoratu nahi da. Horretarako, hainbat erakunde eta kultur elkartek bat egin, eta egitarau zabala antolatu dute aurtengorako.

Hain zuzen ere, bere jaioterrian daude artistaren obra gehienak, hala nola Euskal Kosmogonia, Amona Hilargiren Mamuak, Hilarriak, Olatua, Benito Barruetaren monumentua, Matxitxakoko Bataila eta Lurdeia.

Oroimenerako eguna

Bermeoko Udalak larunbat hau aukeratu du Basterretxearen jaiotzaren mendeurrena ospatzeko, eta gaur goizean Barrueta Arte Elkarteko kideek Nestor Basterretxearen omenezko marrazkiak egin dituzte frantziskotarren klaustroan, Hilarriak artelanen artean.

11:00etan 'Nestor Basterretxea 100 urte' erakusketa inauguratu da. Bertan, Nestorrek berak bere lagun bermeotarrei oparitutako artelanak ikus daitezke, orain arte publikoki inoiz erakutsi gabeak.

Erakusketa maiatzaren 4tik 12ra egongo da ikusgai 19:00etatik 21:00etara. Gainera, Barrueta Arte Elkartekoek Basterretxearen lanekin egin duten liburutxoa aurkeztu da.

11:30ean, artistaren lagunek hitzaldi bat eman dute Nestor Basterretxea aretoan. Bertan, bideoak proiektatu dira, tartean, artistaren elkarrizketa bat.

13:00etan, Frantziskotarren klaustrora eraman dute ospakizuna, eta bertan egin dute omenaldia, Hilarriaren inguruan. Alkartasuna Dantza Taldeak ohorezko aurreskua egin du eta Nadia Nemeh Shomaly Bermeoko alkateak hitz batzuk esan dizkie bertaratutakoei.

Gainera, lore-eskaintza egin da Nestor Basterretxearen gustuko abesti batekin. Bermeoko Udalaren programak udazkenean jarraituko du. Urrian eta azaroan, bestalde, Turismo Bulegoak antolatutako bisita gidatuak egingo dira.