Alejandro Morellon, Maialen eta Joxe Mari Berasategi, Miren Billelabeitia eta Ander Izagirre, saridunak

Euskadi Literatura sarietako lau kategoriatako irabazleak eman ditu ezagutzera gaur Eusko Jaurlaritzako Kultura eta Hizkuntza Politikako sailburu Bingen Zupiriak.

Gasteizko Artium Museoan egindako agerraldian, Gaztelaniazko Literatura, Euskarazko Literatura Itzulpena, Saiakera Euskaraz eta Saiakera Gaztelaniaz kategorietako Euskadi Literatura sariak jasoko dituzten egileen izenak eman dituzte ezagutzera: Alejandro Morellon, El peor escenario posible; Maialen Berasategi eta Joxe Mari Berasategi, Paradisua; Miren Billelabeitia, Norberak maite duena; eta Ander Izagirre Vuelta al país de Elkano.

Euskadi Literatura sarietako aurtengo lehen hiru saridunen izenak iragan astean iragarri zituzten: Arantxa Urretabizkaiak Azken Etxea lanagatik Euskarazko Literatura modalitatean jasoko du saria, Patxi Zubizarretak Haur eta Gazte Literaturaren modalitatean Zerria lanagatik eta Joseba Larratxek Literatur Lanaren ilustrazioa modalitatean Ni ez naiz Mikel Laboa obragatik.

Epaimahaiko kideen ustez, Alejando Morellonen El peor escenario posible liburu argi eta dibertigarria da, "irakurketa gozagarria". Edurne Portelak, Juan Infantek, Aixa de la Cruzek, Jesus Camarerok eta Patricia Millanek osatu dute Gaztelanizko Literatura modalitateko epaimahaia.

Bestalde, Xabier Olarrak, Jose Manuel Lopezek, Koldo Bigurik, Arantxa Etxebarriak eta Idoia Gilleneak osatutako epaimahaiak erabaki du aurtengo Euskarazko Literatura Itzulpenaren saria Maialen Berasategiri eta Joxe Mari Berasategiri ematea. Paradisuarekin, epaimahaiko kideen iritziz, "irakurketa gozoko testua" lortu dute itzultzaileek, "itzulpen mekanikotik behar adina urrunduta". 

Euskarazko Saiakeraren alorrean, epaimahaiaren ustez, Miren Billelabeitiaren Norberak maite duena liburuak "irakurketaren plazera eta garrantzia defendatzen du, eta proposatzen du metodologia dialogikoaren bitartez, klasikoak eguneko gaietara eramatea, gazteekiko hartu-emana izatea eta irakurle gazteen arreta piztea". Ane Miren Larrinagak, Nekane Goikoetxeak, Ainhoa Novok, Juan Ramon Makusok eta Xabier Aierdik osatu dute epaimahaia.

Azkenik, gaur igarritako laugarren sariaren —Gaztelaniazko Saiakerako Euskadi Literatura saria— inguruan epaimahaiko kideek uste dute Ander Izagirreren Vuelta al país de Elkanok idazketan "ikerketa historikoaren zorroztasuna hizkera zabar eta umoretsuarekin konbinatzen" duela, "obra irakurtzen duenari pertsonaiak eta gorabehera historikoak hurbilduta". Maria Jesus Pandok, Iñigo Maraurik, Maria Pilar Rodriguezek, Maria Gorosarrik eta Mikel Reparazek gaineratu dutenez, Izagirrek "pertsonaia heroikoen desmitifikazioa eskaintzen du, baina gure begirada garaikidera hurbilduz.