Bertan behera utzi dute Dimetal Fest jaialdia

Dimetaleroak Kultur Elkartea Dimetal Fest metal jaialdiaren antolatzaileek iragarri dutenez, irailaren 24 eta 25erako iragarrita zegoen edizioa, seigarrena, bertan behera gelditu da, ezingo baita betiko moduan egin eta, hortaz, kontu ekonomikoak ez baitira ateratzen.

Jaialdia "hibernazioan" sartuko da orain, baina itzultzeko asmoa dute, "covid aurreko normaltasuna gure bizitzetara itzuli eta seigarren edizio bat prestatzeko osagai guztiak ematen direnean".

"Euskara, euskal kultura, feminismoa eta metala, errespetua eta aniztasuna" bandera dituen jaialdian jotzekoak ziren, besteak beste, PiLT, Hira, Idi Bihotz, Akelarre, Asgarth, Cobra, Conflict Noise, Ehun Kilo, Eraso!, El Reno Renardo, Niña Coyote eta Chico Tornado eta Soziedad Alkoholika.