Depeche Modek kontzertua eskainiko du BECen datorren urteko martxoaren 21ean

Euskal Herrian geldialdia egingo du Depeche Mode talde britainiarrak "Memento Mori" izeneko biran. Zehazki, BEC Bilbao Exhibition Centre erakusketazokako Bizkaia Arenan (Barakaldo, Bizkaia) joko du datorren urteko martxoaren 21ean, Last Tour kontzertuen sustatzaileak jakinarazi duenez. 

Sarrerak uztailaren 17an egongo dira salgai, aurresalmentan, livenation.es webgunean, eta bi egun geroago, 19an, egongo dira eskuragarri ohiko salmenta puntuetan (lasttour.org, livenation.es, Ticketmaster eta El Corte Ingles).

Musika elektronikoko taldeak 29 data berri erantsi dizkio "Memento Mori" birari, aurtengo udan eta udazkenean Europan, Mexikon, Kanadan edo AEBn izango dituenei batuta. 2024ko kontzertu egitaraua Londresko O2 Arena aretoan abiatuko da, eta apirilaren 5ean bukatu Kolonian (Alemania). Tartean Berlinen, Parisen, Madrilen, Bartzelonan edo Milanen arituko dira. 

Depeche Modek 100 milioi disko saldu ditu, eta mundu osoko 35 milioi ikus-entzuleren aurrean jo du. "Etengabeko bilakaeran dagoen eta aparteko eragina duen talde musikala da", kontzertuen sustatzaileak nabarmendu duenez. 

Taldeak martxoan atera zuen "Memento Mori" diskoa, euren ibilbideko 15.ena.