Kobetamendi dantzan hasiko da
Anplifikadoreek, DJen platerek eta bozgorailuek piztuta beharko dute dagoeneko Kobetamendin, gaurtik igande goizaldera arte atertu gabe festibalarien belarrietan durundi egingo duten doinuak zabaltzeko berotzen.
Hiru gaualdietako lehenengoan, uztailaren 10 honetan, denetarik izango da entzungai Bilboko tontorrean: britpopa, funka, soula, rocka, indiea, popa… Baina gehienak — musikari erreparatzen dietenen arteko gehienak— Pulpen, Jarvis Cockerrek (Sheffield, 1963) gidatzen duen taldearen, deiari erantzunez igoko dira mendira.
Britpop mugimenduaren Lau Handietatik, Pulp falta zen Kobetamendin ordezkaritza izateko: Suede 2011n eta 2019an egon zen Bilbao BBk Liven, Oasiseko gallaghertar anaiak ere egonak dira, bakoitza bere aldetik, eta Blurreko Damon Albarn The Good, The Bad and The Queenekin eta Gorillazekin aritu da jaialdian.
Bada, gaur kitatuko dute arantza Jarvis Cockerrenen zaleek. Pulpek Bilbora ekarriko ditu, pop rock dotorearen zaleen gozagarri, “Disco 2000” eta “Common people” Different class diskoko ereserkiak eta, seguru asko, More duela hilabete kaleratutako diskoko ale gehiago ere. “Common people” kantuak Bilbon duela astebete eskas Glastonbury jaialdian sortu zuen bozkarioaren hamarren bat eragiten badu, ez da gutxi izango.
Pulpen arrastotxoan, zeinek gertuago zeinek urrunago, beste dozena erdi bat artistak zabalduko dituzte gitarra doinuak jaialdiaren lehen arrats-gauetan, hala nola Hindsek, Wunderhorsek, Japanese Breakfastek, English Teacherrek eta Cala Vento katalanek, baita Michael Kiwanukaren proposamen apain eta beroak ere, souletik.
Elektronikaren bideari jarraituta egingo dute publikoaren gogorako bidea Bicep Belfasteko bikoak (Chroma ikuskizuna taularatuko dute Euskal Herrian), Kaytranadak eta Judelinek, adibidez, eta erdibidean, elektronikaren eta funkaren arteko bidegurutzean, kokatzen da agertoki arteko eguneko ibilbidean derrigor sartu beharreko taldea: Ca7riel eta Paco Amoroso argentinar bikoa eta beren banda trebea.
Tamalez, argentinarrez gozatzen dutenek, emanaldia osorik ikusten dutenek, ezingo dute Hofe ikusi, ordutegi bera egokitu baitzaie, agertoki ezberdinetan. Hofez gain (00:45, Johnnie Walker agertokia), Eider (17:30, Johnnie Walker agertokia), Mirua (17:45 San Miguel agertokia) eta Tatta & Denso (19:20 Johnnie Walker agertokia) euskal ordezkariak daude lehen eguneko egitarauan.
Albiste gehiago musika
Kylie Minogue, Nathy Peluso, Damiano David eta Fat Dog, Kobetamendiko festa burutzeko
Bilbao BBK Livek aurtengo edizioko azken gaualdia du gaurkoa. Malko, Amateur, Janus Lester, Viva Belgrado, Sparks eta Carolina Durante ere ageri dira gaurko kartelean.
Ipar Irlandako Kneecap raperoek Kobetamendiko musikazaleen arreta bereganatu dute
Belfasteko taldea Bilbao BBK Live jaialdiko karteleko izen handietako bat izan da. Irlandera erabiltzeaz gain, arazorik gabe hitz egiten dute politikaz eta gizarte arazoez, eta agertokiaren gainean jaia pizten iaioak dira.
Pulpek klase erakustaldia egin du Kobetamendin
Britpoparen beteranoek kontzertu dirdiratsua eskaini dute bart, Bilbao BBK Live jaialdiaren hemeretzigarren edizioaren aurreneko gaualdian. Mirua, Michael Kiwanuka eta Ca7riel & Paco Amoroso ere nabarmendu dira bertan.
Giro goxo eta paregabea sortu du Michael Kiwanukak Bilbao BBK Live jaialdian
Michael Kiwanuka kantari eta konpositore britainiarra izan zen Bilbao BBK Live 2025 jaialdiko lehen eguneko protagonistetako bat. Soul, folk eta rock doinuak uztartuz, publikoa bereganatu zuen giro aparta eta emozionala sortu zuen artistak.
?fmt=webp-alpha&qlt=80)
Rayeren, Amaiaren, Bad Gyalen eta Kneecapen gaua, Bilbao BBK Liveko bigarrena
Jaialdiaren erdibidean, Belfasteko rap hirukotea eta Bad Gyal, Raye, Amaia, Jessica Pratt eta Amyl and The Sniffers igoko dira oholtzara, besteak beste. Xsakarak eta Sal del Cochek ere joko dute Kobetamendin.
Giro paregabea eta festarako gogoa nagusi, BBK Liven lehen uneetan
Kanpinean mota guztietako zerbitzu eta ekintzak eskaintzen dituzte, baita euskal dantzak ikasteko aukera edota yoga egitekoa ere. Munduko leku guztietako zaleak biltzen ditu Bilboko musika jaialdiak, kontzertuekin gozatu eta hiriko giroa bizitzeko asmoz.
Eider Saezek eta Miruak eman diete hasiera BBK Live jaialdiaren aurtengo edizioari
Eider Saez lazkaotarrak ireki du 2025eko BBK Live jaialdia. Pozik dago Estatuko eta nazioarteko artista ospetsuekin kartela partekatzeaz. Maitane Iruñ eta Mattin Zeberio, berriz, Mirua taldeko kideak dira. Agertokiaren tamainak errespetu pixka bat eman arren, "dena ematera" aterako direla diote.
Bilbao BBK Live orroka hasi da
Raya Diplomática, Javier Calvo Los Javis zinemagile bikoteko kidearen punk taldea, izan da Bilbao BBK Live Bereziak hiriko kontzertuen zikloa irekitzeko arduraduna. Igande goizaldera arte, atertu gabe entzungo da musika Bilbon.
Gorka Urbizu Abbey Road estudio mitikoetan grabatzen hasi da: "Amets bat da edozein musikarirentzat"
Lekunberriko musikariak Londresko Abbey Road estudioetan bi kantu grabatuko ditu datozen egunetan. "Ez da soilik estudio bat, musikaren historiako izenik handienak pasa diren eraikin bat da", adierazi du Urbizuk hunkituta estudioen ateetan. Bere asmoa lan hau azaroan kaleratzea da, zuzeneko gira bukatuko duenean.